Hevserokê Giştî yê DEM Partiyê Tuncer Bakirhan li Wanê axivî û got: “Hûn di 31’ê Adarê de têk çûn. Ji vê hesaba xwe ya xelet vegerin.” Hevseroka Giştî Tulay Hatîmogûllari jî got ku heta Abdullah Zeydan mazbataya xwe digire dê têkoşîna xwe bidomînin.
DFG’ê bertek nîşanî hedefgirtina rojnamevanan a di dema protestoyên bajarên Kurdistanê yên piştî hewldana darbeyê ya Wanê da û wiha got: “Em van êrişên li dijî mafê agahî negirtinê yê gel bi tundî şermezar dikin û êrişên li dijî rojnamevanan demildest bi dawî bikin.”
Girtiyên siyasî ku bi daxwaza azadiya fîzîkî ya Rêberê PKK’ê Abdullah Ocalan û çareseriya pirsgirêka kurd greva birçîbûnê didomînin ragihandin ku di 4’ê Nîsanê roja jidayikbûna Abdullah Ocalan de çalakiya xwe derbasî qonaxeke nû dikin. Girtiyan diyar kir ku wan biryara boykotkirina telefon û serdana malbatan dane.
Koordînasyona Çavdêriyê ya Navenda Greva Birçîbûnê aşkere kir ku kontrolên tenduristiyê yên girtiyên di greva birçîbûnê de ne nehatine kirin û îaşeyên wan nehatine dayîn.
Komeleyên ziman û wêjekaran bi daxuyaniyekê bertek nîşanî nedayîna mazbata Abdullah Zeydan dan û wiha bang li îktîdara AKP-MHP'ê kirin: “Demildest dest ji êrişên xwe yên li ser vîna gelê kurd berde û rêzê li vîna gelê kurd a demokratîk bigire.”
Di hilbijartinên Bedlîsê de 2 hezar û 18 dengên DEM Partiyê nederbasdar hatin hesibandin û îtîraza ji bo deng jinûve bên hejmartin li Lijneya Hilbijartinê ya Bajar hatiye kirin jî hêj biencam nebûye. Parlamentera DEM Partiyê Ceylan Akça got ku heke îtîraz were redkirin dê serî li YSK’ê bidin û îtîrazên xwe yên li kolanan bidomînin.
Ji ber îtîraza AKP’iyan a li dijî du sindoqan, li Curnê Reş biryar hate dayîn ku hilbijartin dîsa bê lidarxistin. Bertekên li dijî vê biryarê didomin. Dê li dijî biryarê li Lijneya Hilbijartinê ya Bajar îtîraz were kirin.
Li navçeya Farqînê ya Amedê AKP’ê ji bo 40 sindoqan îtîraz kir. Di encama îtîrazê de dê di 40 sindoqan de deng jinûve bên hejmartin.
DEM Partiyê encamên rast ên hilbijartinên li navenda Şirnexê hatin kirin, bi avahiya xwe ve daliqand.
Gelek rêxistinên hiqûqê li dijî darbeya hilbijartinê ya Wanê daxuyanî dan û ev bang kirin: “Hewl didin bi destê darazê îradeya xelkê Wanê xesp bikin. Banga me ji bo hempîşeyên me ew e ku li dijî faşîzm û zilmê li cem gelê kurd cih bigirin.”
Ji wezîrên kevn ê AKP’ê Huseyîn Çelîk têkildarî nedana mazbataya Abdullah Zeydan ê DEM Partiyî wiha got: “Divê siyaseta bi destê darazê tê rastkirin bêyî ku paş de vegere were dawîkirin.
batên ku li Wanê zarokên wan di serdegirtina malan de bi îşkenceyê hatin binçavkirin anîn ziman ku AKP hewl dide tola têkçûna xwe ya li Kurdistanê hilîne. Malbatan bi lêv kirin ku ne ji mirinê ne jî ji girtîgehê natirsin û wiha bang li herkesê kirin: “Bêdeng nemînin, bêdengî me hemûyan dikuje.”
Dadgeha Destûra Bingehîn rayeya tayînkirina qeyûman a li komeleyan a Wezareta Karên Hundir betal kir.
Kes an jî kesên nasnameya wan nediyar duh bi şev êrişî avahiyê navçeya Keçîorenê yê DEM Partiyê kirin.
Rêxistinên Ekolojiyê bertek nîşanî “kemîna siyasî” ya li dijî Abdullah Zeydan hatiye danîn dan û partiyên muxalefetê û raya giştî ya demokratîk vexendin piştgiriya gelê Wanê yê ku xwedî li îradeya xwe derdikeve.