Girtiyên siyasî bi daxwaza azadiya fîzîkî ya Rêberê PKK’ê Abdullah Ocalan û çareserkirina pirsgirêka kurd a bi rêyên demokratîk, 165 roj in li ber xwe didin.
Hevseroka MED TÛHAD-FED'ê Eylem Bîrtaneyê diyar kir ku heya pêkanînên antîdemokratîk û dermirovî bi dawî nebin wê çalakiyên wan bidomin û banga xwedîderketina li çalakiyên "bibe dengê azadiyê" kir.
Rojnamevan Esra Solîn Dal ku piştî hat girtin 14 rojan di hucreyeke yekkesî de tê tecrîdkirin, diyar kir ku rojnamevanî tê îllegalîzekirin.
Girtiya siyasî Esma Ayaz a ku 25 sal in di girtîgehê de ye, ji roja hatiye girtin û vir ve di nava her berxwedana zindanan de cihê xwe girtî ye. Ayaz a niha di çalakiya ji Rêberê PKK'ê Abdullah Ocalan re azadî de ye, di axaftina telefonê ya dawî ya bi malbata xwe re de wiha got: “Hûn jî li ber xwe bidin.”
Malbat û parêzerên girtiyê nexweşê giran Mehmet Emîn Çam ê di mejiyê wî de ûr heye, diyar kirin ku mafê wî yê dermankirinê tê astengkirin û roj bi roj rewşa wî xerabtir dibe.
Nobeta Edeletê ya Emîne Şenyaşar di roja 97’an de berdewam kir. Parlamenterên DEM Partiyê çûn serdana Emîneyê banga ‘deng bidin daxwaza edeletê ya dayika Emîne, hûnê jî maf bidinê’ kirin.
Hevserokê Giştî yê DEM Partiyê Tuncer Bakirhan têkildarî êrişa çekdarî ya li dijî avahiya partiyê ya Bêrecûkê wiha got: “Tu hêz nikarin me ji vê doza me ya mafdar bikin.”
17 kesên duh li Rihayê bi serdegirtinên malan hatibûn binçavkirin hatin berdan.
Şaredariya Bajarê Mezin a Amedê 25 wesayîtên ku di dema qeyûm de bi hejmareke zêde kire kiribûn vegerandin û milyonek û 220 hezar lîre teserûf kir.
Rêxistinên civaka sivîl ên Şirnexê diyar kirin ku ji ber negirtina tevdîran, lehiya li Cizîrê rê li ber mexdûriyetên mezin vekiriye.
Malbata nexweşê SMA’yê Mîrzayê 16 mehî ji bo alîkariya dermanan ku bihayê wan 58 milyon û 722 hezar û 761 TL ye, banga alîkariyê kir.
YNK’ê ragihand ku ew biryara taloqkirina hilbijartinê ya Komîsyona Hilbijartinê ya Bilind a Serbixwe ya Iraqê qebûl nakin.
Êrişa li dijî avahiya DEM Partiyê ya Bêrecûkê hat protestokirin û wiha hate gotin: “Alçaxên cesaret di xwe de dîtin ku êrişî partiya me bikin hay ji dîroka têkoşîna me nîne. Em natirsin, li vir in.”
Endamên Partîzan û YDG’ê xwest girtiyên 1’ê Gulanê bên berdan û banga xwedîderketinê li gel kirin.