Konferansa bi dirûşma “Em bi hêvî û wêrekî xwe birêxistin bikin û faşîzmê têk bibin” a rêxistina HDP’ê ya Amedê di roja duyemîn de dewam dike. Konferans li Eywana Konferansê ya Vedat Aydin a avhiya HDP’a Amedê pêk tê. Parlamenterên HDP’ê Mûsa Farisogûllari, Dersim Dag û Remziye Tosûn, hevşaredar û rêveber û delegeyên HDP’ê û gelek kes beşdarî konferansê bûn. 

 

BERTEK NÎŞANÎ BINÇAVKIRINÊ DA 

 

Hevserokê Rêxistina HDP’ê ya Amedê Zeyat Ceylan axaftina vekirinê ya konferansê kir û bertek nîşanî binçavkirina Hevşaredara Sûrê Fîlîz Buluttekîn da û got ew ê polîtîkayên qeyûm yên îqtîdarê qebûl nekin. 

 

Ceylan da zanîn ku têkoşîna wan a azadiyê ji bo gelên Rojhilata Navîn e û bal kişand ser yekîtiya neteweyî ya kurd. Ceylan anî ziman îradeya gelê kurd bi sedê salane ji aliyê hêzên navnetewî ve tê astengkirin û lê tenê têkoşîna kurdan dikare van plansaziyên nebaş ên li ser kurdan têk bibe. 

 

‘EM Ê TECRÎDÊ BIŞKÊNIN’ 

 

Ceylan diyar kir ku tê xwestin kurd bêstatû bimînin û ew ê yekîtiya kurd ava bikin. Ceylan bal kişand ser tecrîdkirina Rêberê PKK’ê Abdullah Ocalan û tayînkirina qeyûmên ser şaredariyên wanû got: “Çi dikin bila bikin, Em ê li rojeva xwe hûr bibin. Em ê tecrîdê bişkênin û faşîzma qeyûman têk bibin.” 

 

Piştî axaftina Ceylan, konferans ji çapemeniyê re girtî dewam kir.