QAMIŞLO – Şandeya Parlemana Başûrê Kurdistanê ku bi armanca çavdêriya hilbijartinê hatine Rojava bi aliyên siyasî yên Rojava re hevdîtin kirin û serkeftina hilbijartinan li wan pîroz kirin.
Şandeya çavdêrên hilbijartinan, duh têkildarî encama hilbijartinê civîna çapemeniyê li bajarê Amûdê yê girêdayî kantona Qamişlo pêk anî. Piştî civîna çapemeniyê şandeyê Bakurê Kurdistanê di deriyê Sêmalka re vegeriya Bakurê Kurdistanê. Şandeya Başûrê Kurdistanê û ronakbîrê Îraqî Elî El-Xewar jî li Qamişlo bi aliyên siyasî yên Kurdî li Rojava re civîn pêk anîn. Şandeyê hevdîtinên xwe bi Encûmena Niştimanî ya Kurdî, Partiya Demokratîk a Paşverû ya Kurdî li Sûriyeyê, Hevbendiya Niştimaniya Demokratîk a Kurdî li Sûriyeyê û Partiya Yekîtiya Demokratîk re pêk anîn. Di serdana Encûmena Niştimanî û Partiya Paşverû de şandeyê sedema nebeşdarbûna wan di hilbijartinên federaliya demokratîk a Bakurê Sûriyeyê de pirsî. Di navbera herdu aliyan de rewşa siyasî û nakokiyên di navbera van her du aliyan û Rêveberiya Xweseriya Demokratîk a Rojava de hatin nîqaşkirin.
DIVÊ HEMÛ ALÎ TEV LI PERGALA FEDERALIYA DEMOKRATÎK BIBIN
Şandeyê di serdana xwe de piştrast kir ku parlemana herêma Başûrê Kurdistanê piştgiriya şoreşa Rojava û tecrûbeya rêveberiya Xweseriya Demokratîk ku ev çend sal in tê meşandin dike û diyar kir ku divê hemû alî beşdarî sîstema federaliya demokratîk a Bakurê Sûriyeyê bibin.
Li Buroya Hevbendiya Niştimaniya Demokratîk a Kurdî li Sûriyeyê şandeya parlemanê bi rayedarên Hevbendiyê re civiyan û serkeftina qonaxa duyemîn a hilbijartinên federaliyê li wan pîroz kir.
Herdu aliyan rewşên siyasî û têliyên di navbera partî û rêxistinên Kurdî yên Rojava de nîqaş kirin. Şandeyê daxwaza xwe ku Hevbendî bi rola navbênkar rabe anî ziman da ku helwest û nêrînên di navbera Encûmena Niştimanî ya Kurdî û Rêveberiya Xweseriya Demokratîk de ji hevûdu nêzîk bike.,
Rêveberê Hevbendiyê Salih Gedo ji aliyê xwe ve amadebûna xwe ji bo bi rola navbênkariyê rabe anî ziman û wiha got: “Encûmena Niştimanî ya Kurdî li aliyê dijberên doza Kurdî û mafên gelê Kurd li Rojava ye. Lê evan siyasetên Encûmenê tenê dikevin xizmeta dijminên Kurdan.” Şande di dawiyê de serdana Buroya Partiya Yekîtiya Demokratîk a bajarê Qamişlo kir û ji aliyê serokê Partiyê Şahoz Hesen û rayedarên Partiyê ve hate pêşwazîkirin. Şandeyê serkeftina hilbijartinên federaliyê li rayedaran pîroz kir û destnîşan kirin ku ev rê ber bi peydakirina çareseriya aloziya Sûriyeyê bi giştî ye.
QONAXA ÇARESERIYA SIYASÎ AXIVÎN
Herdu aliyan rewşa siyasî ya dawî li herêmê gotûbêj kirin û rola Kurdan û pêkhateyên Bakurê Sûriyeyê di rêveberiya qonaxa çareserkirina siyasî ya aloziya Sûriyeyê de bi riya îlankirina sîstema federaliyê piştrastkirin ku mînaka herî guncaw ji bo çareserkirina aloziya Sûriyeyê ye. Endamên şandeya çavdêran diyar kirin ku ew ji tecrûbeya Rêveberiya Xweseriya Demokratîk pir kêfxweş in ji ber ku bi ser ketiye û sîstema federaliya demokratîk li Bakurê Sûriyeyê ava kiriye, her wiha gelekî pesna rola jinan di vê sîstemê de kirin.
Di dawiya serdanê de şandeya herêma Başûrê Kurdistanê alîkarî û piştgiriya parlemanê bi Rojava re dubare kirin û dane zanîn ku ew amade ne alîkariya xwe bi Rêveberiya Xweser û sîstema federal re bikin.