RIHA - Operasyon û şerê li dijî Bakur û Rojhilatê Sûriyeyê di roja 5'an de berdewam dike. Li sînorê Rihayê tevgera esker, OSO, ambulans û maşîneyên cenazeyan zêde bûn. Welatiyên li ser sînor neçar man ku xaniyên xwe vala bikin û warên xwe terk bikin. Welatiyan bertekên xwe wiha anî ziman: "Em li warê xwe bûn penaber."
Operasyon û şerê Tirkiye ku li dijî Bakur û Rojhilata Sûriyeyê di 9'ê Cotmehê de da despêkirin di roja 5'an de berdewam dike. Yekîneyên taybet ên TSK'ê û komên El Kaide yên di bin navê “Artêşa Neteweyî ya Sûriyeyê" li hev kom bûne bi hevre bi tang, top û balafirên şer êrîşî axa Rojava dikin. Li herêma operasyonê şereki dijwar heye. Herî zêde li ser sînorê Serêkaniyê, Kaniya Xezalan, Serêkaniyê, Pirsûs û Bîrecîkê şer dijwar bûye. Di roja 4'emîn a şer de li Serêkaniyê û Xaniya Xezalan bê navber tevgera ambulansan kêm nebû. Welatiyên li gund û navçeyên Pirsûs, Bîrecîk û Xaniya Xezalan dijîn neçar man ku xanî û warên xwe terk bikin.
GELÊ PIRSÛSÊ: DIXWAZIN OSO LI MALÊN ME BI CIH BIKIN'
Welatiyên gundên Navçeya Pirsûsê ya Rihayê diyar kirin ku êrîşa TSK’ê ya li dijî Kobanê didome. Welatiyan anîn ziman ku Qeymeqamê Pirsûsê ferman daye ku hemû gundiyên li Gundê sînor xaniyên xwe vala bikin. Welatiyan destnîşan kirin ku gel bi tundiya derûnî re rû bi rû ne. Welatiyan anîn ziman ku xaniyên xwe terk nakin û wiha gotin: "Ger ku em xaniyên xwe vala bikin wekî Efrînê wê Artêşa Sûriyeya Azad (OSO) di xamiyên me de bi cih bibin. Li gelek gundan eskeran dest danîne ser zeviyan û maşîyenên eskerî li van zeviyan bi cih kirine. Destûr nadin ku welatî berhemên xwe yên nava zeviyan kom bikin. Esker ji welatiyan re dixwaze ku HDP neyê vir û 3-4 kes li hev kom nebe û gefan dixwin.
WALÎ WÊ FERMANA VALAKIRINA GUNDAN BIDE
Qeymeqamê Pirsûsê duh bi keyayên taxan re civîn li dar xist û xwest yên ji mala xwe dernakevin wan tespît bikin. Hat diyar kirin ku Walî ji bo hemû gund vala bibin wê sibê Giştînameyeka fermanê belav bike û bixwaze her kes malên xwe vala bike.
QEREQOLÊN LI SER SÎNOR VALA KIRIN'
Li ser sînor ê Pirsûsê duh di nava rojê de top nehatin avêtin. Lê piştî saet 18.00’an êrişên li dijî sînor zêde bûn. Gelek esker û OSO sewqî ser sînor kirin. Li Gundê Kersan û Sêwidî esker bi cih kirin. Qereqola eskerî ya li ser sînorê Kobanê jî vala kirin û şandin Pirsûsê. Dîsa 3 roj naber dan perwerdehiya li dibistanên ser sînor.
LI SÎNORÊ KANIYA XEZALAN ŞERÊ DIJWAR
Yek ji cihê şer bi dijwarî lê pêş dikeve Navçeya Kaniya Xezalan û Girê Spî ye. Bê navber yekîneyên OSO sewqî ser sînor dikin. Dema konvoya OSO derbas bû, li taxa Tatlicakê bi obusan çoltara Girê Spî bombe kirin. Li gundên Yabse û Silo yên herema Girê Spi şer bi dijwarî didome. Sewqîyata yekîneyên OSO di saetên serê sibê de berdewam kir. Hat diyar kirin ku şer didome û gelek ambulans şandin herêma şer. Birîndar û cenazeyan dibin nexweşxaneya Rihayê.
EM LI WELATÊ XWE BÛN PENABER
Nûçegîhanê Televîzyona Al Arabiya pişti got "Arêşa Sûriye ya Azad sivîlan bombe dike" hat binçavkirin. Hemû gund û gundikên li ser sînor hatin valakirin. Welatiyên ku gundên xwe terk kirin, bertek nîşanî operasyonê dan û gotin: "Em li welatê xwe bûn penaber. Hat diyar kirin ku gundî li Kampa penaberan a Harranê bi cih kirine.
Li navçeya Serêkaniyê ku bi piarnî hatiye valakirin di nava rojê de tevgera ambulansan pir zêde bû. Hat diyar kirin ku gelek cenaze û birindar ji ser sînor rakirin nexweşxaneyan. Sewqiyata eskerî ya li navçeyê ddome. Cotheha TİGEM'ê jî kirin navenda eskeriyê. Li nava zeviyên TİGEM ji her 10 metreyan yek esker nobetê digirin. Bi gelek otobusên sivîl yekîneyên OSO sewqî tesîsên TİGEM'ê kirin.
Dîsa bi sedan polîsên ji Îzmir û bajarên din hatin sewqî Wêreanşarê kirin.
Li navçeya Bîrecîkê jî TSK'ê dest danîn ser nexweşxaneya dewletê û di nava rojê de helikopteran birîndar kişandin.