MÊRDÎN – Li Nisêbînê heta niha 12 kesan ji ber topên hewanê û roketên nayên zanîn ji ku ve hatine jiyana xwe ji dest dan û li ser vê yekê nîqaş didomin. Gelê Nisêbînê di merasîma cenaze û li ber nexweşxaneyê bertek nîşanî rayedarên AKP’ê û dewletê dan û ew hemfikirin ku ev çek ji aliyê Tirkiyê ve hatine avêtin.
Piştî Tirkiyê li dijî bajarên Rojava dest bi operasyonê kirin, 4 roj in gelek topên hewanê û roket li Nisêbînê ketin. Heta niha 12 welatiyan ji ber van çekên teqemenî jiyana xwe ji dest dan û ji 70 kesî jî zêdetir birîndar bûn. Teqîn zirarê jî dan derdorê. Nayê zanîn ku ev topên hewanê û roket ji ku ve hatine avêtin. Di merasîma cenazeyên welatiyan de xelkê Nisêbînê bertek nîşan Serokkomar Erdogan dan.
BERDEVKÊ QSD’Ê DEREWAND
Berdevkê HSD’ê Kino Gabrîel derbarê teqînên li Nisêbînê de daxuyanî da û diyar kir ku eleqeya wan bi topên hewanê ketine Nisêbînê re nîne û dengê qeyda “em ê li hember roketekî biavêjin” ên nûnerên MÎT, artêş û hikumetê k udi 2014’an de kiribûn bibîr xist. Gabrîel wiha got: “Beriya dostên me dijminên me jî baş dizanin ku em her tim ji pêkanînên wiha şerm dûr dimînin.”
NISÊBÎNÎ: BERPIRSIYAR DEWLET E
Şêniyên Nisêbînê ku bandorek neyînî ji şer dibînin ji roket û topên hewanê li malên wan dikevin Tirkiyê berpirsiyar digirin. Şêniyên Nisêbînê duh li cihê bûyera 9 kesan jiyana xwe ji dest da û gelek kes birîndar bûn bertek nîşanî Serokkomarê AKP’yî Tayyîp Erdogan dan. Piştî bûyerê welatiyên li ber Nexweşxaneya Nisêbînê kom bûn di kêliya midurê Emniyeta Nisêbînê, Waliyê Mêrdînê û Serokê AKP’A Nisêbînê xwestin serdana nexweşxaneyê bikin bertek nîşanî wan dan. Welatiyan bi gotina “qatil” berz kirin û nehiştin rayedar daxuyanî bidin.
‘YÊN LI HEMBER MIROVÊN ME NE’
Şêniyên navçeyê diyar dikin ku topên hewanê û gule bi zanebûn ji aliyê “hêzên kontra” ve diavêjin navçeyê û dixwazin di bin navê van bûyeran de Tirkiyê mafdar derxin. Welatiyên ji ber ewlehiyê nexwestin li hember kamerayê biaxivin wiha gotin: “Yên li hember însanên me ne. Em ji wan bi bawerin ku ew ê li hember me tiştek wiha nekin.”
‘QSD GELÊ NISÊBÎNÊ NAKE HEDEFA XWE’
Welatiyek Nisêbînî da zanîn ku ne mimkin e QSD gelê Nisêbînê bike hedefa xwe û wiha bertek nîşan da: “Çima dewlet ji gel re nabêje dê çibikin. Tenê dixwazin gel dakeve jêrzemînin avahiyên xwe. Dewlet qey nizane ev jêrzemîn têr nakin.”
‘VÎ ŞERÎ NE QSD DA DESTPÊKIRIN’
Welatiyek din ê ji Nisêbînê anî ziman ku her kesî Nisêbînê ji çavê xwe derxistiye û qedexeya derketina derve ya di 2016’an de bi bîr xist û wê demê jî heman rewş qewimîn. Welatî got: “Wê demê jî xelkê Nisêbînê koç bû û niha jî koç dibe. Em kurd in. Lê kuştina kurdan ne di xema kesî de ye. Heke dewlet di vê mijarê de pir xemxûr bûya wê niha ev tişte neqewimiyan. Ne QSD’ê vî şerî da destpêkirin. Kî şer dabe destpêkirin berpirsê van kuştinan jî ew e. Divê ew çareseriyê bibîne. Qey em ew dibêjin haya me ji dengê qeydên MÎT’ê nîne.”