RIHA - Êrîşa Tirkiyeyê ya li hemberî Bakur û Rojhilatê Sûriyeyê ket roja 4'an. Gelên taxên li ser ên navçeyên Pirsûs û Bêrecûk ku tê xwestin bên valakirin lim dijî valakirina taxên xwe bi bertek in. 

 

Êrîşa Tirkiyeyê ya li hemberî Bakur û Rojhilatê Sûriyeyê di roja 4'an de didome. Hêzên QSD'ê bersiv didin êrîşên hêzên OSO û TSK'ê û pevçûn li seranserê sînorê Bakur û Rojhilatê Sûriyeyê berbelavbûn. Li Rihayê ku piştî destpêkirina êrîşê rewşeke awarte lê heye, 3 nexweşxaneyên mezin ên dewletê yên bajar û nexweşxaneyên dewletê yên li navçeyan derbasî rewşa hewarê bûne. 

 

MIROV LI PÊŞIYA NEXWEŞXANEYAN E

 

Beşeke Nexweşxaneya Lêkolîn û Perwerdeyê ya Mehmet Akîf Ersoy ya li Rihayê ji leşker û OSO'yiyan re hatiye veqetandin û tê dîtin ku hin birîndarên sivîl ên li Kaniya Xezalan û Serêkaniyê jî tînin vê nexweşxaneyê. Li beşa lezgîn a nexweşxaneyê rewşeke awarte heye. Rawestîna xizmên birîndarên sivîl ên navçeyên Kaniya Xezalan û Serêkaniyê a li ber nexweşxaneyê berdewam dike û hat hînbûn ku rewşa hin birîndaran krîtîk e. Hin xizmên nexweşan ku naxwazin navê xwe bidin diyar dikin ku ji birîndarên xwe bê hêvîne û dibêjin ku xwezil ev şer çênebûna. 

 

MASEYA BEXŞANDINA XWÎNÊ YA KIZILAYÊ

 

Li heman nexweşxaneyê Kizilayê maseya xwînê hatiye danîn. Hat hînbûn ku ev mase ji bo birîndarên OSO û TSK'ê hatiye danîn. Kesên ku dixwazin xwîna xwe bibexşînin qeydên xwe li maseyê çêdikin û ji bo dayîna xwînê derbasî hundirê nexweşxaneyê dibin. Tê dîtin ku her kêliyê liv û tevgera ambûlansan li nexweşxaneyê heye. 

 

Nexweşxaneya Lêkolîn û Perwerdeyê ya Şanlıûrfayê ya herî mezin a Rihayê jî 2 beşên wê ji qada leşkerî re hatiye veqetandin. Tê gotin ku piştî destpêkirina êrîşa Tirkiyeyê ya li hemberî Bakur û Rojhilatê Sûriyeyê bi dehan birîndar anîne nexweşxaneyê.  Agahî hene ku hin birîndaran jiyana xwe ji dest daye û rewşa gelekan ji wan jî giran e. Têketina sivîlan a ji bo beşa leşkerî qedexe ye. 

 

GEFA LI XEBATKARÊN NEXWEŞXANEYAN TÊ XWARIN 

 

Nexweşaxaneyeke din ku birîndar tênê jî Nexweşxaneya Dewletê ya Wêranşarê ye. Hat hînbûn ku duh bi şev 8 leşkerên ku di pevçûnan de birîndar bûne anîna vê nexweşxaneyê û rewşa wan giran e. Hat diyarkirin ku ji aliyê birîndaran ve gef li xebatkarên nexweşxaneyê tê xwarin û ji wan tê xwestin ku bi tu kesî re qet neaxivin. 

 

NEXWEŞXANE LI SIVÎLAN HAT GIRTIN

 

Hat hînbûn ku Nexweşxaneya Dewletê ya Kaniya Xezalan ji sivîlan re hatiye girtin û ji endamên OSO û leşkeran re hatiye amadekirin. Li nexweşxaneyê rewşeke aram heye. Nexweşxaneya Dewletê ya Serêkaniyê jî bi temamî ji sivîlan re hatiye girtin. 

 

KANIYA XEZALAN

 

Her çiqas Kaniya Xezalan ku bûye baregeha êrîşa hatiye destpêkirin, di nava rojê de rewş lê aram bixwuyê jî tê dîtin ku endamên OSO û MÎT'ê lê xebatên keşfê didomînin. Tê ragihandin ku li gundê Yabsê yê ku dikeve rojavayê navçeyê pevçûneke dijwar heye. Tê gotin ku endamên OSO'yê hewl didin li vî gundî bi pêş ve biçin lê nikarin biçin. Di saetên berê êvarê gelek endamên OSO'yê sewqî navçeyê hatin kirin û di saetên şevê de jî sewqî qada şer hatin kirin. 

 

SERÊKANIYÊ

 

Di nav rojê de ji Serêkaniyê Rihayê ji milên ve bi obusan li aliyê rojhilat û rojavayê Serêkaniya Bakur û Rojhilatê Sûriyeyê dan. Di nav rojê de gelek caran balafiran jî bombe li bajar barandin. Ev bombebarandin heta saetên derengên şevê berdewam kirin. 

 

TÊKETINA ROJNAMEGERAN A BAJAR ASTENG KIRIN

 

Li Serêkaniyê di nav rojê de timtik liv û tevgera ambûlansan hebû û hat hînbûn gelek birîndar û cenazeyan anîn Nexweşxaneya Dewletê ya Serêkaniyê. Sewqkirina leşkerî di nav rojê de jî berdewam kir. Niştecihên navçeyê yên ku ji ber êrîşan malên xwe terk kirin jî derbasî navçe û bajarên derdorê bûn. Dizên ku vê çûnê weke fersend dîtin ketin gelek malan dizî kirin. Keyayê taxa Tûrgût Ozal Mehmet Saît Avci ku me bi rêya telefonê xwe gihandê diyar kir ku ji ber êrîşan malên xwe terk kirine lê agahî ji wan re tên ku li navçeyê gelek dizî tê kirin. Her wiha akredîtasyon li rojnamegeran tê rezkirin û destûr nayê dayîn ku rojnameger bikevin navçeyê. 

 

PIRSÛS

 

Li Pirsûsê jî gelek tank û cebilxane sewqî ser sînor hatin kirin. Ji aliyê leşkeran ve valakirina malan li niştevihên taxên li ser sînor tê ferzkirin. Lê niştecih di rawestîna taxên xwe de bi israr in. Li taxa Mehserê ji ber ketina topa hewanê ku 2 kesan jiyan xwe ji dest da bertek hene. Welatiyên gund bertek nîşanî anonsên valakirina gund a leşkeran didin. 

 

GEL MALÊN XWE TERK NEKE

 

Piştî ketina topa hewanê Qaymeqamıya Pirsûsê maseya krîzê ava kir. Maseya krîzê biryara valakirina taxên li ser sînor da û ev biryar di mizgeftan de ji welatiyan re hat ragihandin û hat xwestin ku welatî bi awayekî lez mal^n xwe terk bikin. Welatiyan bertek nîşanî biryara qaymeqamiyê da û diyar kirin ku dê malên xwe terk nekin. Di saetên şevê de jî sewqiyat leşkerî ya li Pirsûsê domiya û heta serê sibehê bombebarana li hemberî Kobanê berdewam kir. 

 

BÊRECÛK

 

Valakirina taxên li ser sînor ên Bêrecûkê dest pê kir. Li taxên Konak, Ziyaret, Zerî, Aşme, û Goktepeyê di mizgeftan de ji welatiyan hat xwestin ku malên xwe terk bikin. Welatiyên ku naxwazin malên xwe terk bikin, li malên xwe sekinandîne. Her wiha Nexweşxaneya Dewletê ya Bêrûcûk ji sedî 70'ê ji leşker û endamên OSO'yê re hatiye veqetandin û nexweşxane gelek kêm sivîlan qebûl dike.