KELAR - Bi hezaran welatiyên navçeya Kelar a Germiyanê li dijî êrîşên Tirkiye ya li ser Bakûr û Rojihlatê Suriyeyê meşiyan û gotin, “Çiya piştevanên me ne, deşt cihê tolhildanê ne”. Girsê li dijî êrîşan ji bo hemû Kurdan û raya giştî ya cîhanê 4 daxwazên xwe anîn ziman û xwest Kurd li dijî êrîşan ji bo parastina Rojava yekîtiya xwe ava bikin.
Li navçeya Kelar a Îdareya Germiyan Bereya Niştimanî, li dijî êrîş û şerê Tirkiyeyêyê ya li ser Bakûr û Rojhilatê Suriyeyê, meşek girseyî lidar xist. Girse li Parka Leyla Qasim kom bûn û heta nava bazarê meşiyan. Di meşa ku bi hezaran kes beşdar bûn de, pankartên “Terorîst Erdogan”, “Çiya piştevanên me ne, deşt cihê tolhildanê ye”, “Kok li Rojava ye, Germiyan piştevan e”, “Dagirkirina Rojavayê Kurdistanê, dagirkirina Başûrê Kurdistanê ye” vekirin. Girsê di meşê de bê navber dirûşmeyên “Bijî berxwedana Rojava”, “Rojava nakeve”, “Terorîst Erdogan” berzkirin.
Li ser navê Bereya Niştimanî ya Dijî Dagirkeriyê Mela Taha Germiyanî axivî û got: “Rojava ya ku niha bûye hedefa êrîşan, di şikandina çeteyên DAIŞ’ê de rolek sereke lîstiye. Di vê oxirê de bi hezaran şehîd dane. Ev qas berdelan û qurbanî hatine dayîn. Lewma divê Neteweyên Yekbûyî, Amerîka, Rusya, Yekîtiya Ewropa erkên xwe yên exlaqî pêk bînin.”
Piştî axaftina Mela Taha, liser navê Bereya Niştimanî, 4 daxwaz ji raya giştî ya Kurd û cîhanê re eşkere kir. Mela Taha daxwazên xwe wiha rêz kir: "Divê Kurd ji bo rewşa Rojava û misrogerkirina parastina Rojava yekîtiya xwe pêk bînin. Em daxwaz ji hemû Kurdistaniyan, kesayetên dilsoz û raya giştî ya Kurdistanê dikin ku li dijî dagirkeriya dewleta Tirk bisekinin û viya wekî erka xwe ya netewî zanibin. Pêwîste Neteweyên Yekbûyî biryarek derxîne ku parastina îdareya Bakûr û Rojhilatê Suriyeyê li hemberî her cure êrîşên biyanî mîsoger bike. Divê ji bo darizandina DAIŞ’yên hatine girtin, dadgehek navneteweyî bê avakirin. Ji ber ku hebûna wan bi vî rengî tuleke û DAIŞ wê dîsa serî hilde."