Baroya Amedê di çalakiya xwe ya hefteya 197’emîn de li ber Dadgeha Amedê xwest kujerên Tahîr Elçî bên dîtin. Gelek parêzer beşdarî çalakiyê bûn û pankarta “Em ê te ji bîr nakin” vekirin. Cîgira Baroya Amedê Gazal Bayram daxuyanî da û bal kişand ser operasyona li dijî bajarên Rojava. 

 

Bayram da zanîn ku li gel di ser kuştna Tahîr Elçî de 3 sal derbas bûn jî heta niha di dosyeya lêpirsînê de tu pêşketinek şênber çênebûye. Bayram got heta kujerên Elçî neyên dîtin û tişta pêwîst neyê kirin dê dest ji lêgerîna edaletê bernedin. 

 

‘ŞER Û ZEXTAN BI DAWÎ BIKIN’ 

 

Bayram daxuyaniya 9 baroyên herêmê ya têkildarî operasyona li ser Rojava bi bîr xist û wiha got: “Em carek din dubare dikin ku divê demildest ev şer were rawestandin.” Bayram mudaxeleya polîsan a duh li ber HDP’ê li rêveberên HDP’ê hatibû kirin şermezar kir û got ew dixwazin zext û tundiya li ser daxwaza aştiyê bê bidawîkirin. 

 

‘JI BO ZAROKAN AŞTÎ’ 

 

Sekrtera Navenda Mafên Zarokan a Baroya Amedê Berçek Sancar jî bal kişand ser Roja Zarokên Keçik a Cîhanê û wiha got: “Zarok di şer de û bi amûrên şer tên kuştin. Em bang dikin ku şerê hatiye destpêkirin were rawestandin. Em ji bo zarokan dibêjin aştî hema niha.”

 

Parêzeran çalakiya rûniştinê li dar xist û pişt re belav bûn.