MÊRDÎN - Heyeta ku Hevserokê KCD Berdan Ozturk û rêveberên HDP’ê di navde, navçeya Nisêbînê ziyaret kirin û li avahiya HDP'ê ya Navçeya Nisêbînê daxuyanî dan. Parlamentera HDP'ê Saliha Aydeniz, diyar kir ku îktîdara AKP-MHP'ê dixwaze li tirkiyeyê pergala dagirkeriyê ava bike. Hemû kesên li dijî vê pergalê disekinin wekî dijmin tên îlankirin.
Hevserokê Kongreya Civaka Demokratîk (KCD) Berdan Ozturk û endama Dîwanê Salîha Aydenîz jî di nav de heyeta KCD û HDP'ê li navçeya Nisêbînê li cihên ku teqîn pêk hatin lêkolîn kirin. Piştî lêkolînê heyet derbasî avahiya HDP’ê ya Nisêbînê bûn. Heyet ji aliyê Hevşaredarên Nisêbînê Semire Nergiz û Ferhat Kut û rêveberên HDP'ê ve hatin pêşwazîkirin. Heyetê û li wir daxuyaniyek da çapemeniyê. Parlamentera HDP'ê Saliha Aydenîz li vir daxuyanî da û hewla dagirkirina Rojava şermezar kir. Aydeniz, diyar kir ku dema qedexe hatin îlankirin li Nisêbînê komkujî pêk hat û niha dîsa bi komkujiyan re rû bi rû ye û wiha got: "Îktîdara faşist a AKP û MHP'ê vina gel tune dihesibîne û şer li ser gelan ferz dike. Dixwazin li Tirkiyeyê pergala dagirkeriyê ava bikin. Dema vê pergala dagirker ava dike, yên li dijî vê pergalê derdikevin wekî dijmin îlan dikin."
AYDENÎZ: EV ÊRÎŞ LI DIJÎ HEMÛ GELAN PÊK TÊ
Aydenîz, da zanîn ku niha li Rojava bi tevlêbûna hemû gelan pergalek nû tê avakirin û wiha got: "Ev pergala ji aliyê gelan ve tê avakirin ji bo hemû cîhanê dibe minak. Îro li dijî Rojava êrîşek heye. Ev êrîş li dijî gelan pêk tê. AKP-MHP êdî nikare vî welatî bi rêve bibe. Bi rêbazên çetewarî Rojava dagir dike. Navê vê yekê jî dikin 'Kaniya Aştiyê' Vê êrîşê ji bo xwîn, kuştin, tunebûna gelan pêk tîne. Dixwaze DAIŞ'a ku bûye belayê cîhanê ji nûve aj bike.
Hevşaredara Nisêbînê Semîre Nergiz jî anî ziman ku destkeftiya şer nabe û wiha got: "Di şer de yên winda dikin gel in. Zarok û jin winda dikin. Gel şer naxwazin. Em dixwazin şer rawestînin aştî û diplomasiyê pêş bixin."
Heyetê piştî ziyareta li Nisêbînê derbasî Navçeya Hezexê ya Şirnexê bû.