ENQERE – Hevserokê Giştî yê ÎHD'ê Ozturk Turkdogan, tekildarî operasyona li dijî axa Bakur û Rojhilatê Sûriyeyê û daxwaza statuya kurdan wiha got: “Tişta niha em fam dikin îktîdara siyasî, MHP û dewletên din di şer de israr dikin. Em jî di aştiyê de bi israr in. Têkoşîna me ya ji bo aştiyê wê bidome.
Êrîş û operasyona ku Turkiye li dijî Bakur û Rojhilatê Sûriyeyê di 9'ê Cotmehê de da destpêkirin, di roja 3'emîn de berdewam dike. Bertek û nerazîbûnên li dijî êrîş û operasyonê zêde dibin. Hevserokê Giştî yê Komeleya Mafên mirovan (ÎHD) Ozturk Turkdogan, xwest demek berî demekê operasyon bi dawî bibe. Turkdogan, anî ziman ku Neteweyên Yekbûyî erka xwe pêk nînin û wiha got: "Em wekî parazvanên mafên mirovan her dem alîgirê aştiyê ne. Şer bi xwe re kuştin û xerakirinê tînin. Demek dirêje li cîhanê moderniteya kapîtalîst krîzê dijî. Hina hemû nirxên mafên mirovan tên binpêkirin. Neteweyên Yekbûyî (NY) Pergala Mafên Mirovan li Rojhilata Navîn erka xwe pêk nînin. "
Turkdogan, da zanîn ku Tirkiye bi israr û înat armanc dike ku li şûna çareseriya demokratîk û aştiyane, bi rêbazên li gorî xwe çareser bike û wiha axivî: "Di sala 2015'an de dîsa pêvajoya şer dest pê kir. Rewşa pevçûnê ji hundirê Tirkiye derbasî dervê Tirkiyeyê bûye. Ev şerê li ser axa Kurdan nîşan dide ku Tirkiye di esasê xwe de naxwazin Kurd bibin xwedî statu. Ji ber daxwazên Kurdan ên Statuyê li ser axa Kurdan şer didin meşandin. Çareseriya pirsgirêka Kurd ne zahmet e. Bi taybeti di pêvajoya ku li meclîsa Tirkiyeyê partiyek wekî HDP'ê hebe çareserî hêsantir e. Dîsa rola Abdullah Ocalan a li ser tevgera Kurd diyarker e. Mixabin li şûna vê yekê qada şer bêtir fireh kirin."
GELÊ TIRKIYE DI BIN TALÛKEYÊ DE NE
Turkdogan, destnîşan kir ku operasyona ku Tirkiye li dijî Bakur û Rojhilatê Sûriyeyê daye destpêkirin, hemû gelê Tirkiyeyê dixe bin talûkeyê û wiha axivî: "Şer koçberî, talankirin, wêrankirin, kuştinê bi xwe re tîne. Dîsa bi sedhezaran, bi milyonan mirov wê ji cih û warên xwe koçber bibe. Bi taybetî di mijara penaberan de Tirkiye wê zahmetiyên mezin bijîn. Divê Tirkiye li gorî peymanên mafên mirovan tev bigere."
EV DI HIQUQÊ DE ŞER E
Turkdogan, xwest meseleya rojava bi diyalog û rêya aştiyê çareser bibe û wiha lê zêde kir. Divê hebûna Kurdên li wir neyê ji bîr kirin. Li Sûriyeyê bi milyonan Kurd, Turkmen, Asurî, Suryanî û Xiristiyan hene. Divê Tirkiye vê rastiya herêmê bibîne. Li şûna bi ewlehiyê gefan dixwe divê bi rêya diyalog û muzakereyan çareser bike. Li gorî hiqûqa navneteweyî "Şer" nayê wateya ku du dewlet bên beramberî hev. Îro tişta pêş dikeve di hiqûqê de Şer e. Dikevin nava çalakiya kuştinê ku encama wê tune ye. Ger ku kuştin hebe şer jî heye. Komara Ereb a Sûriyeyê ma ne dewlet e. Dewlet e. Niha tu peymana Tirkiye bi Rejîma Sûriye re heye? Li gorî peymana Edene jî ger ku li dijî axa we êrîşên germ hebe hûn dikarin heta 5 km operasyona eskeri pêk bînin. Niha ji bo vê operasyonê divê ji Hikûmeta Şamê destûrê bixwazin.
Turkdogan, helwesta CHP'ê ya tezkereyê jî rexne kir û got: “Diviya bû ku CHP'ê ji tezkereyê re negota erê. Diviya bû bigota na. Dîsa Partiya İYİ û Partiya Saadetê jî gotin 'Erê". Hem îktidarê rexne bikin û hem li tenişta îktîdarê cih bigirin ev nakokî ye. Li Tirkiyeyê zêdeyî 20 milyon Kurd dijîn. Mi milyonan xizmên Kurdên Bakur li Rojava dijîn. li Iraqê dijîn. Em vê rêbazê hilnabijêrin. Wê qadên sivîl zerarên mezin bibînin. Ew di şer de israr dikin, em di aştiyê de israr dikin."
MA/ Zemo Aggoz