AMED - Ji kesên 53 roj in li dijî tayînkirina qeyûman di çalakiya Nobeta Demokrasiyê de cih digirin, yek jê jî Şadiye Gunduz a 85 salî ye. Gunduz, her roj tev li çalakiyê dibe û ji bo beşdarbûna nobetê jî got: "Tu dibê qey daweta diya min e, ma ez jibo çi têm? Helbet ji bo aştiyê têm."
Piştî Wezareta Karên Navxweyî qeyûm tayînî şaredariyên bajarên mezin Amed, Wan û Mêrdînê kirin, li dijî tayînkirinaa qeyûman Nobeta Demokrasiyê dest pê kir. Nobeta Demokrasiyê di roja 53'yan de ye. Yek ji çalakgerên nobetê jî Şadiye Gunduz a 85 salî ye. Gunduzê ji roja ewil a nobetê de di nav çalakiyêd e cih girtiye. Her çend nexweş be û temenê wê zêde be jî her roj li Kolana Lîse ya Amedê tev li Nobeta Demokrasiyê dibe.
'HELBET JI BO AŞTIYÊ'
Gava em ji Gunduzê re dibêjin tu ji bo çi tev li çalakiyê dibî, dibêje: "Tu dibê qey daweta diya min e. Ma ez ji bo çi têm? Helbet ji bo aştiyê têm. Ji ber neheqî li me hatiye kirin têm vira. Ev şaredarî heqê me ye. Êdî be se. Her roj balafiran bi ser çiyayên me de dişînin. Malan bombe dikin. Ma kurdan çi kiriye? Ma dizî kirine? Em vê zilmê qebûl nakin. Êdî bes e."
Gunduz, diyar kir ku ji ber vê bêwestan tev li çalakiyê dibe û got: "Ez ji bo aştiyê hatime vira. Gotin şer heye, ez jî hatim. Bila êdî ciwan nemirin. Ne polîs, ne leşker, ne jî gerîla. Hemû jî zarokên me ne. Bila kes nemire."
Her wiha Gunduz ji bo operasyona leşkerî ya li hemberî Rêveberiya Xweser a Bakur Rojhilatê Sûriyeyê jî got: "Tu dibê qey Amerîka, Rûsya, Alman pembo xistine guhên xwe û çavên xwe girê dane. Ji bo çi şer dikin? Nexwe bila kurê wî jî biçe şer. Em şer naxwazin."