AMED – Endamê Hereketa Azadî Abdullah Bozkuş li dijî plana bêkurdkirinê banga yekîtiyê li kurdan kir. Cîgirê PÎA Sedat Dogan jî got şerê li dijî Rojava dê tu encamê neyne û li şûna şer li ser formula jiyanek mirovane bê lêgerînkirin.
Li dijî operasyona muhtemel a Tirkiyê ku bi destûra Amerîkayê dê pêk were nerazîbûn her ku diçin zêde dibin. Partiyên Kurdistanî yên li bakurê Kurdistanê li dijî operasyonek muhtemel a Rojava nerazîbûn nîşan dan û wek “heke şer pêk were dê trajediyek mirovahî pêk were” şîrove kirin û li dijî vê yekê banga yekîtiyê li kurdan kirin.
Endamê Hereketa Azadî Abdullah Bozkuş diyar kir ku gelê kurd li Rojava li dijî DAIŞ’ê şerek mezin da û li gelek herêman destkeftiyên mezin bi dest xist. Bozkuş da zanîn ku heke operasyonek muhtemel pêk were dê axa Rojava were parçekirin û demografiya herêmê were xerakirin û li dijî vê yekê banga yekîtiya neteweyî li gelê kurd kir.
‘DIVÊ AMERÎKA DEST JI ŞAŞÎTIYAN BERDE’
Bozkuş anî ziman ku vekişîna DYA’yê wê rê li ber şerek mezin veke û xwest DYA li tavilê dest ji van şaşîtiyên xwe berde û nehêle li dijî kurdan şer pêk were. Bozkuş ji bo parastina destkeftiyên kurdan bang li hemû kurdan kir ku di nava yekîtî û bihevrebûnê tevbigerin û got: “Rojava di bin xetereyek mezin de ye. Divê kurd bi ruhê seferberiyê rabin ser pêya.”
‘DIXWAZIN KURDAN TUNE BIKIN’
Bozkuş diyar kir ku Tirkiye dixwaze bi hênceta ku 3 milyon penaberan li Rojava bicih bike operasyonê pêk bîne û got: “Baş e, em bipirsin ew 3 milyon ji bajarên kurdan penaber bûne gelo? Dixwazin wan bicih bikin bila bibin li bajarê jê hatine bicih bikin. Ev plana dagirkirinê plana dixwazin herêmên kurdan bêkurd bihêlin û kurdan li wir tune bikin. Dixwazin bicihkirina penaberan demografiya Rojavayê Kurdistanê biguherînin. Plana dixwazin li vir bixin meriyetê plana sûcê mirovahiyê ye. Divê Neteweyên Yekbûyî, Yekîtiya Ewrûpayê û hemû hêzên navnetewî li dijî vê yekê dengê xwe bilind bikin.”
‘YEKÎTÎ PÊK WERE DÊ TALÛKE BERALÎ BIBIN’
Cîgirê Serokê Gitşî yê Partiya Însan û Azadiyê (PÎA) Sedat Dogan jî destnîşan kir ku destwerdanek bi şer û xwînê dê tu encamê nexwe destê Tirkiyê û wiha got: “Divê li şûna vê yekê li ser formula jiyanek mirovane were avakirin. Di operasyonek muhtemel ku pêk were de wê sivîl bêwar bimînin. Bila her kes li warê xwe û di nava hev de bijîn. Têkoşîna esasî ew e jiyankirina bi hev re ye. Divê li dijî pergala ku dixwazin yekîtiya li wir parçe bike têkoşîn bê dayîn. Destwerdanek pêk were destwerdanek li dijî mirovahiyê ye. Heke hûn operasyonê pêk bînin jî hûnê kurdan çawa bextewar bihêlin? Ev operasyona dixwazin pêk bînin li dijî ehlaqê ye. Ev projeyek e. Rojava axa gelê kurd û gelên bi wan re dijîn e. Ev geşedanên tê texmînkirin wê ji bo ereb, kurd, fars û tirkan tu encamê bi dest nexe.”
Dogan bal kişand ser grîngiya yekîtiya neteweyî ya kurdan û heke kurd li Kurdistanê yekîtiya xwe ava bikin wê hemû talûkeyên li dijî kurdan bên beralîkirin.