AMED - Rêveberê Partiya Heremên Demokratîk (DBP) ê Amedê Fedayî Akar di nobeta demokrasiyê de hewldana operasyona eskerî ya Tirkiye rexne kir û got: "Ez ji AKP'ê dipirsim çi karê Tirkiyê di Rojava de heye. Li fezayê bibêjin destkeftiyên kurdan hene hûn ê bi lez mudahaleyî wê bikin. Hemû alemê têkoşîna Kurdan a li dijî DAIŞ'ê dît, lê we nedît."
Rêxistina HDP'ê çalakiya Nobeta Demokrasiyê ya li dijî tayînkirina qeyûman a Şaredariyên Amed, Wan û Mêrdînê, di roja 51'an de dewam kir. Çalakiyê, li Kolana Lîseyê ya pêşberî Şaredariya Bajarê Mezin a Amedê dewan kir. Hevşaredar, parlementerên HDP'ê, aktîvîstên Tevgera Jinên Azad (TJA), Dayikên Aşitiyê, Partiyên Îttîfaka Kurdistanî û gelek welatî beşdarî çalakiya rûniştinê bûn. Girsê gef û planên operasyona eskerî ya Tirkiyê ku dixwaze li dijî Bakûr û Rojhilatê Sûriyeyê li dar bixe şermezar kir û dirûşmeyên "Bijî Berxwedana Rojava" û "Rojava wê ji Tirkiyê re bibe goristan" berz kirin.
'WÊ AŞITÎ SERBIKEVE'
Hevseroka HDP'ê ya Amedê Hulya Alokmen Uyanik, bal kişan ser planên operasyona eskerî ya li dijî Bakûr û Rojhilatê Sûriyeyê û wiha got: "Dîsa di rojevê de şer û kuştin heye. AKP û MHP di aliyê aborî û hiqûqê de qediya ye. Tiştekî bide civakê tune ye. Ji bo berjewendiyên şexsî şer geş dike. Heta îro me çawa aştî parast, emê dîsa aştiyê biparêzin. Ne dengê tang û topan, dê dengê aşitiyê bi ser bikeve.
Li ser navê Dayikên Aşitiyê Ferha Akbulut tayînkirina qeyûman a şaredariyan bibîrxist û wiha got: "Me şaredariyên xwe bi dest xistin lê heq, hiqûq, edalet tune ye. Dayikên ku aşitî dixwestin xwestin biçin Enqereyê. Lê destûr nedan biçin Enqereyê. Em wê şermezar dikin." Akbûlût operasyona li dijî Bakûr û Rojhilatê Sûriyeyê jî dexne kir û got: "Em vê neheqiyê û heqaretê qebûl nakin. Bijî Berxwedana Rojava."
Pişt re rêveberê Partiya Heremên Demokratîk (DBP) ê Amedê Fedayî Akar derbarê nobeta demokrasiyê ya ku di roja 51'an de wiha axivî: "Em bang li hemû saziyên sivîl ên civakî dikin. Werin em bibin yek berxwedana xwe mezin bikin. Em dîsa feraseta qeyûmê têk bibin. Ez ji AKP'ê dipirsim çi karê Tirkiyê di Rojava de heye. Hûn çi ji kurdên ku gef li we ne xwarî, guleyek jî ne berdaye we dixwazin. Li fezayê bibêjin destkeftiyên kurdan hene hûn ê bi lez û bez mudahaleyî wê derê jî bikin. Dev ji dijminiya kurdan berdin. Hemû dinyayê têkoşîna kurdan ya li hemberî daîşa barbar, hov û tecawizkar dît tenê te nedît. Dîrok we efû nake. Em ji Amedê careke din qîr dikin em ê bi berxwedanê serbikevin ji ber ku em mafdarin mafê xwe dixwazin."
Piştî axaftinan nobeta demokrasiyê bi çalakiya rûniştinê dawî bû.