Hin malbat bi angaşta “HDP’ê zarokên wan revandiye serê çiya” ji 2’ê îlonê ve li ber avahiya HDP’a Amedê çalakiya rûniştinê li dar dixin. Her roja ku diçe hejmara van malbatên tê gotin ji aliyê AKP’ê ve hatine arastekirin kêmtir dibe. Welatiyên HDP’ê çalakiya li ber HDP’ê nirxandin. 

 

Alî Sanmaz (53) diyar kir ku pêwîste cudakarî di navbera dayikan de neyê kirin û îktîdar du standartiyê pêk tîne. Sanmaz da zanîn ku îktîdar dayikên li ber HDP’ê dibîne lê Dayikên Şemiyê ji nedîtî ve tê û got: “Divê îktîdar ewilî Dayikên Şemiyê bibîne. Heke armanca AKP rastiye bila li êş û daxwaza hemû dayikan guhdar bike. Divê cudakariya nêrînên siyasî nexin navbera dayikan. Lazime hikumet ber avahiya partiyekê hedef nede nîşandan. Divê li tavilê çareserî ji vê yekê re bê dîtin.” 

 

‘SOYLU XELKÊ BERÊ HEV DIDE’

 

Îslam Ayşîn (25) jî da zanîn ku pêwîste dayik ne li ber HDP’ê çalakî li dar bixin divê li ber saziyên dewletê çalakî li dar bixin û wiha got: “Ev lîstikek dewletê ye. Suleyman Soylu xelkê berê hev dide. Yên çalakiya Dayikên Şemiyê bi şidetê qedexe dikin, heman kes îro dixwazin xelk li ber HDP’ê kom bibe. Ez bang li dayikan dikim ku werin em bibin yek û em biçin li hemû saziyên dewletê mafên zarokên xwe biparêz in. Bila hemû dayikên esker, polîs û gerîlayan li ber avahiyên saziyên dewletê û hikumetê kom bibin. Bila bêjin em aştî û aramiyê dixwazin.” 

 

‘DIXWAZIN HDP’Ê TUEN BIKIN’ 

 

Giyasettîn Kiliç (50) jî anî ziman ku bi salane dayik li vî welatî digirîn û wiha got: “Ji bo em naxwazin dayik bigirîn û ji bo aştiyek mayînde pêk were bi salane me dikin terorîst. Lê yên van dayikan digirînin dixwazin bi rêbazên şer welat birêve bibin. Welat bi van pêkanînên mîlîtarîst û faşîzane nayê birêvebirin. Ji bo dayik negirîn pêdiviya welat bi aştiyek mayînde heye. Divê her kes ji bo aştiyek mayînde destê xwe bixe bin kevir. Divê îktîdar dayikan neke malzemeyê siyaseta xwe. HDP partiyek qanûnî ye. HDP ne dewleketek duyemîn e ku diçin ber deriyê HDP’ê. Dixwazin bi şoven siyasî HDP’ê tune bikin. Tune hesibandina vîna gelê kurd tu feydeyê nayne vî welatî.” 

 

‘ÇIMA HETA ÎRO NEHATINE RÛNENIŞTINE’ 

 

Şehmûz Yetek (50) jî destnîşan kir ku hin malbat bi zanebûn dişînin ber HDP’ê û hin malbat ji bo pereyan diçin li wir rûdinên. Yetek da zanîn ku malbat ne ji bom af û edaletê li wir rûdinên û got: “Çend sal in zarokên wan çûne, lê çima niha diçe li wir rûdinê. Çima heta îro nehatine rûneniştine? Hin kes dibêjin ‘biçin ber HDP’ê çalakî li dar bixin.’ Tu dewletî biçe zarokên wan bîne. Dewlet nikaribe bîne dê HDP çawa bîne.” 

 

Semira Muhammed (30) jî diyar kir ku eleqeya çûna zarokên malbatan bi HDP’ê re nîne û got: “Tiştek di destê HDP’ê de nîne. Ew li ser vîna xwe ya azad çûne. Kesî zorê nedaye wan. Her kes ji xwe berpirsiyar e. Tiştek ji destê HDP’ê were dê texsîr neke.” 

 

‘DIVÊ HEMÛ DAYIK LI BER MECLÎSÊ KOM BIBIN’ 

 

Fikrî Ay (54) jî destnîşan kir ku pêwîste hemû malbat biçin ber Meclîsê li Enqereyê kom bibin û got: “Hemin vê hêza mezin li HDP’ê dibînin çima çareseriyê li pêş naxin? Divê ev mesele li Meclîsê were çareserkirin. Di hemû televîzyonên tirk de gotinan ji HDP’ê re dikin lê nûnerek HDP’ê ango partiyên kurdan nîne. Ez vê şermezar dikim. Ji bo me hemû dayik yek in. 24 sal in çima kes Dayikên Şemiyê nabîne? Kombûna li ber HDP’ê şaşîtiye. Yên ji vê re pêşengiyê dikin bêaqil in.”