Namzetên HDP'ê yên navçeya Hawêl a Sêrtê Remzî Sarsilmaz, di hilbijartina 31'ê Adarê de bi ser ketin û şaredarî ji qeyûm dewr girtin. Gava hevşaredaran şaredarî dewr girt 10 milyon deynê şaredariyê û 9 dosyeyên heczê yên şaredariyê hebûne. Hevşaredar li navçeya ku nifûsa wê 26 hezar e hem bi deyn û dosyeyên heczê re bilî dibin hem jî xizmetê dikin. 

 

'ME QADA HERÎ MEZIN A ŞAREDARIYÊ ÇÊ KIR' 

 

Hevşaredar Remzî Sarsilmaz, anî ziman ku gava ew hatin ser kar wan gelek projeyên ku soz dabûn wê çê bikin çê kirine. Sarsilmaz, bilêv kir ku gava ew derbasî avahiya nû ya şaredariyê bûn wan li şûna avahiya kevn qda herî mezin a navçeyê çê kirine û got, ew ê tevî gel navê qadê diyar bikin. 

 

WESAYÎT JI BO XWENDEKARAN BELAŞ E 

 

Sarsilmaz, bi bîr xist beriya hilbijartinê soz dabûn ku wê wesayît ji bo xwendekaran belaş bin û got, niha du wesayîtên wan xwendekaran dibin û tînin. Her wiha Sarsilmaz, bilêv kir ku ji bo ji jinan re qadên îstihdamê peyda bikin tev digerin û got: "Niha em li navçeya xwe ji bo projeyeke îstihdamê ya jinan dixebitin. Ji bo jin li fabrîkayên tekstîlê yên li vira bixebitin em ê dest bi kursên perwerdehiyê bikin. Niha em ji bo vê atolyeyan vedikin."

 

Sarsilmaz, destnîşan kir ku ew dixwazin erdên xwe bi awayekî pir baş bi kar bînin û got: "Em hewl didin kooperatîfekê ava bikin da li navçeyê hilberîneke sîstematîk çê bibbe. Pêşî me atolyeya dimsê vekir. Di nêz de jî em ê ji bo hinaran qadeke xebatê peyda bikin. Avhewaya navçeya me ji bo serayan baş e. Em ê ji bo vê jî tiştina bikin." 

 

‘TENÊ WESAYÎTEKE ME YA ÇOPÊ HEYE' 

 

Sarsilmaz, destnîşan kir ku ji ber deynê qeyûm, pereyê tê piranî jê tê birîn û loma ew hin waran bisînor dikin. Sarsilmaz, bilêv kir ku pereyê di dest wan de dimîne ancax têra meaşê xebatkaran dike. Her wiha Sarsilmaz, da zanîn ku tenê wesayîteke wan a çopê heye û got, gava wesayîta wan xera dibe 3-4 rojan nikarin çopê berhev bikin. Sarsilmaz, bilêv kir ku pêdiviya wan bi wesayîteke çopê heye û ew li benda alîkariya kardêra ne.