AMED – Hevraportorên Kongreya Rêveberiyên Herêmî yên Konseya Ewrûpayê yên Tirkiyeyê Jakob Wienen û Yoomi Renstrom bi hevşaredar Ahmet Turk, Selçûk Mizrakli û Bedîa Ozgokçe Ertan ên ji wezîfeyê hatin dûrxistin hatin gel hev.
Hevraportorên Kongreya Rêveberiyên Herêmî yên Konseya Ewrûpayê yên Tirkiyeyê Jakob Wienen û Yoomi Renstrom ji bo hin hevdîtinan bikin hatin Amedê. Hevraportoran di çarçoveya van hevdîtinan de bi Hevşaredarê Mêrdînê Ahmet Turk, Hevşaredarê Amedê Selçûk Mizrakli û Hevşaredara Wanê Bedîa Ozgokçe Ertan ên ji wezîfeyê hatin dûrxistin re hatin gel hev.
Hevberdevkên Koma HDP’ê ya Meclîsa Şaredariya Amedê Halîme Bayram û Mehmet Akdogan jî beşdarî civînê bûn. Li gel her du hevraportoran Wienen û Renstrom, Ji Sekreterya Komîteya Şoandina Kongreyê Stephanie Poirel, Pisporê ji komê Angel Mauel Moreno Molina di nava heyetê de cih girtin.
LI SER PERGALA HEVSEROKATIYÊ AXIVÎN
Di hevdîtinê de tayînkirina qeyûman û bêhiqûqiya li dijî rêveberiya xwecihî de hat axaftin û her wiha neheqiya li vîna gel hatiye kirin, pêkanînên qeyûman û pergala hevserokatiyê jî hat nîqaşkirin. Di hevdîtinê de hat ziman ku ji bo demokrasiyê pergala hevserokatiyê prensîbek jêneveger e.
DÛRKETINA JI DEMOKRASIYÊ HAT VEGOTIN
Di hevdîtinê de hat destnîşan kirin ku her roja ku diçe Tirkiye ji demokrasiyê dûr dibe û ferasetek totaliter û kesê wek wan nafikirin jî tên terorîzekirin. Her wiha di civînê de bal kişandin ser îxrackirina bi hezaran karmendan û bêhiqûqiya li dijî namzetên HDP’ê ku di hilbijartina xwecihî de bi ser ketin û mazbata nedan wan jî hat axivîn.
KRÎMÎNALÎZEKIRINA HDP’Ê HAT VEGOTIN
Di hevdîtinê de hat diyarkirin ku dewlet dixwaze HDP’ê krîmînalîze bike û xebatên HDP’ê bi zextan sînor bike, HDP a dengê 6 milyon hilbijêr wergirtiye bi terorîzmê ve bê girê bide. Di civînê de hat gotin her çiqas dixwazin HDP’ê, wekîl, hevşaredar û rêveberên HDP’ê terorîze bikin jî lê heta niha tu delîlek şênber di destê wan de nîne û bi rêya darazê her tiştî rewa dike û pêk tîne. Di hevdîtinê de hat gotin li gel biryarên dadgehan nîne jî lê ji berk u HDP’ê rikberek siyasî ji xwe re dibîne van yekan pêk tîne.
TEMAYA ‘TU NIKARÎ BIBÎ KURD’ NÎQAŞ KIRIN
Di hevdîtinê de temaya “Tu dikarî li vî welatî bibî her tişt lê tu nikarî bibî kurd û jixwe tu qet nikarî bibî hilbijêrê kurd û bêyî bijartin” hat destnîşankirin û ji bo kurd neçin ser sindoqan têgihiştinek wiha tê afirandin û bi vî awayî dixwazin HDP’ê têk bibin.
DOSYE DAN HEYETÊ
Şandeya HDP’ê jî dosyeyek ji lêpirsînên berê li hevşaredaran hatiye vekirin û nivîsên têkildarî bêhiqûqiya qeyûman hatine nivîsin radestî heyeta Ewrûpî kirin.