Hevşaredarên Êlihê Songul Korkmaz û Mehemt Demîr li kafeyek Êlihê bi rojnamegeran e civiyan. Gelek rojnameger beşdarî civîna hevşaredaran bûn û bi hev re taştê xwarin. Hevşaredaran derbarê xebatên xwe de agahî dan û bersiva pirsên rojnamegeran dan. 

 

PERGALA NÛ YA VEGUHÊZIYÊ DA NASÎN 

 

Di civînê de hevşaredar Demîr ewilî axivî û pergala nû ya çûnehatê ku şaredariyê di çend rojên dawî de xist meriyêtê da nasîn. Demîr diyar kir ku ji bo rêya çûnehatê hêsantir bikin hejmara xetan derxistine 19’an û rêya çûnehata wan dirêje jî pergala biveguhêzî xistine meriyetê. Demîr da zanîn ku ji bo veguhêzî hin bêtir erzantir û li gorî rewşa aborî ve plansaziya wê kirine û di serdema pêşiya wan de dê pergala abonetiyê ya veguhêziyê bînin û di butçeya sala 2020’an de dê wesayîtên nû bistînin. 

 

‘ŞAREDARÎ NE CIHÊ RAKETINÊ YE’ 

 

Demîr bersiva pirsa hin kesên di serdema qeyûm de girtine kar ji kar derxistine da û got: “Dema roja em hatin ser rêveberiya şaredariyê me got em kesî ji kar dernaxin. Şaredarî cihek xizmetê ye, ne cihê raketinê ye. Kesên 80 roj rapor wergirtine, nehatine kar û nexebitîne kî dibe bila bibe ne mimkin e em wan li şaredariyê bidin xebitandin. Tişta hatiye kirin jî li gorî qanûnên kar e. Me negotiye em xizmên gazî û şehîdan li şaredariyê nadin xebitandin. Dikare kar bike an nikare gelo em li vê dinêrin. Niha hûn kesek ji kar hatiye derxistin dibînin lê niha li şaredariyê xizmên gazî û şehîdan dixebitin.” 

 

‘SAZIYA JINAN SELÎS DÊ WERE VEKIRIN’ 

 

Hevşaredar Songul Korkmaz jî pirsên derbarê girtina saziyên jinan de bersivand. Korkmaz anî ziman ku ew li şaredariyê girîngiyek taybet didin jinan û got: “Ji bo şaredariyek hilberîner qursên me vekirine hene. Wê hilberîna wan sibê were pêşandan. Saziya jinan a bi navê SELÎS’ê jî dê di demek nêz were vekirin.”