AMED - Şevket Altûntaş ku kurê wî yê esker ji aliyê HPG'ê ve hatiye desteserkirin û tev li çalakiya li ber avahiya HDP'ê ya Amedê bûye diyar kir ku li gel ku gelek kes tên serdana wan jî gavên şênber nayên avêtin û li ser wan qehremaniyê tê kirin.
Çalakiya malbatên ku bi angaşta zarokên wan bi darê zorê derxistine serê çiya, li ber Avahiya HDP'ê ya Amedê dabûn destpêkirin, didome. Di nav van malbatan de malbata esker Muslum Altıntaş (24) ku di 2'ê Cotmehê de li navçeya Pîlemûriyeyê ya Dersimê ji aliyê HPG'iyan ve hatibû desteserkirin jî heye. Bavê esker Şevket Altûntaş ku ji 5'ê Îlonê ve li ber HDP'ê ye, ji ber ku dewletê ji bo anîna kurê wî neketiye nav tu hewldanan bi bertek e. Altûntaş diyar kir ku komeleyên ku serdana wan kirine ji wan re gotine ku dewlet nêzî anîna kurê wan nabe û wiha got: "Me serî li ÎHD'ê da. Piştî demekê me ji TJA'yê jî pirsî. Ji me re gotin ku hikumet nêz nabe. Dê hêla dewletê de jî em çûn her derê. Çûn serokên hemû komên partiyên siyasî."
GOTIN 10 ROJ BÛ 4 SAL
Altûntaş qala pêvajoya desteserkirina kurê xwe jî kir û têkildarî mijarê ev tişt anî ziman: "Dema ku kurê min li leşkeriyê bû agahiyek ji me re hat. Li hemû cihê ku hatin hişê min geriyam û tiştek hîn nekir. Paşê ji wê qereqolê li min geriyan û ji min re gotin, 'Teroristan kurê te revandiye'. Li qereqolê ji min re gotin, 'Ne tirse tiştek bi kurê te nakin, dê heta hefteyek 10 rojan berdin'. Ev hevok hindek be jî bêhna min derxist. Gotin 10 roj lê 4 sal derbas bûn. Kurekî min tenê heye, bila wî berdin. Daxwaza min tenê ev e."
'NIKARIM MAFÊ WAN ÎNKAR BIKIM'
Di berdewamê de Altûntaş destnîşan kir ku beriya 5 mehan dîmenên kurê xwe dîtiye û wiha pê de çû: "Serçav û destên kurê min paqiş bûn, tiraş bûbû, nikarim mafê wan înkar bikim. Kurik dibêje hûn çima alikariya me nakin. Ez ji her du aliyan re jî dibêjim, bi ser kurê min qebedayîtiyan nekin. Min berê jî ev tişt digot û niha jî dibêjim. Gavek jî di paş de gav navêjim. Hewce bike ez ê biçim Qendîlê jî. Ewqas serdan tên kirin lê gavek şênber nayê avêtin. Li vêderê me bi kar tînin û qehremaniya xwe dikin. Tên reklama xwe dikin, stranên xwe dibêjin. Hin kes jî tenê ji bo ku bibêjin çû cem dayika tên. Em pir in û di ferqa vê yekê de ne. Kesên ji bo reklamê tên pir in lê ez nikarim ji wan re bibêjim hûn ji bo reklamê tên. Ev der ne yê provakatorî û xwenîşandanê ye. Li vêder armanceke me heye, em zarokên xwe dixwazin."
'HEKE PÊVAJOYA AŞTIYÊ HEBÛYA NIHA NE LI ÇIYA BÛN'
Şefket Bîngol ku angaşt dike kurê wî Tûncay Bîngol bi darê zorê revandine serê çiya jî diyar kir ku 4 sal in li deriyê dewletê li kurê xwe digere û wiha got: "Lê min tu bersivek negirt. Heke dewletê pêvajoya aştiyê bidomanda dê îro ev pirsgirêk dernediketin û kurê min ne li serê çiya bû." Bîngol anî ziman ku qenalên 4 sal berê ji bo ji wan re biaxive li ber wan geriyaye, îro ji bo axaftinê ew li pêşiya wê ne got ku lê ew ê ki wan re neaxive.
digerin lê
MA / Fethî Balaman
