AMED - Serokê Partiya Azadî Ayetûllah Aşitî di Nobeta Demokrasî ya li dijî tayînkirina qeyûman de got: "Ez ji we dipirsim van şaredariyên me yên ku we ceza kirî sûcê wan çiye? Tenê sucê wan ji bo ku kurd in û Kurdistanî ne. Werin em ji bo doza vî gelî mezlum bi hevre hereket bikin.”
Nobeta Demokrasiyê ya HDP a li dijî tayînkirina qeyûman ser şaredariyên Amed, Mêrdîn û Wanê di roja 26'an de berdewam kir. Berî çalakiyê polîsan Kolana Lîsê ya pêşberî Şaredariya Bajarê Mezin a Amedê ku nobet lê tê girtin dorpêç kirin. Parlementerên HDP’ê û gelek welatî beşdarî nobetê bûn.
Hevşaredarê Bajarê Mezin a Amedê Selçûk Mizrakli yê hat cihê nobetê, ji aliyê girseyê ve bi lêxistina çepik û berzkirina dirûşma “Amed ya me ye” hat pêşwazîkirin. Endamên Meclîsa Şaredariya Bajarê Mezin a Amedê ji ber Lîseya Ziya Gokalp pankarta “Dest ne de vîn û bajarê min” hilgirtin û heya cihê nobetê bi berzkirina dirûşmeyan meşiyan. Di çalakiya îro deSerokê Partiya Azadî Ayetûllah Aşîtî, rêveber û Serokê Partiya Komînîst a Kurdistan a Semsûrê Mustafa Korkmaz ji bo piştevaniyê çalakgeran ziyaret kir.
Girse demek çalakiya rûniştinê li dar xist, dirûşm berz kir û stranan gotin û bi vî awayî li dijî tayînkirina qeyûman hêrsa xwe dan nîşandan. Pişt re daxuyanî hat dayîn.
‘EM LI CIHÊ RAST IN’
Hevseroka HDP'a Amedê Hulya Uyanik Alokmen ewilî di daxuyaniyê de axivî û destnîşan kir ku li her deverê li dijî tayînkirina qeyûman nerazîbûna xelkê didome û got: "HDP ji avakirina xwe ve heta îro behsa edaletê dike. Ji bo vê bedel jî dane û hêj jî dide. Hêj em bi binçavkirinan şiyar dibin. Ji bo kesên ku duh li Pasûrê jiyana xwe ji dest dan sersaxiyê dixwazim. Dîsa zarokek duh di bin erebeya zirxî de ma û jiyana xwe ji dest da. Ji bo wî jî em sersaxî dixwazin. Em ji bo ku xwîn bisekine di nava têkoşînekê de ne. Em li cihê rast in û bi hêvî ne.”
‘SUCÊ WAN ÇIYE?’
Pişt re Serokê Partiya Azadî Ayetûllah Aşitî jî axivî û wiha got: "Ez ji we dipirsim van şaredariyên me yên ku we ceza kirî sûcê wan çiye? Tu sûcê wan nîne. Tenê sucê wan ji bo ku kurd in û Kurdistanî ne. Ji vê zêdetir tu sûcê wan tune ye.”
‘RÛMETA WE PERÇIQANDINE’
Aşitî bang li gelê kurd kir û axaftina xwe wiha domand: “Kurdno bizanin ku ev qeyûmên hatin tayînkirin pê li rûmeta we kirine, rûmeta we perçiqandine. Gereke em vê fêm bikin.” Aştî ji alema îslamê re jî bang kir û wiha dirêjî da axaftina xwe: “Xwedê ji bo jiyaneke bi rûmet pêxember şandine. Ji bo berxwedana jiyaneke bi rûmet, ma heya kengî ê hûn guhdar bikin ku rûmeta birayê we yê misilman ên kurd were perçiqandin. Hûn ê heta kengî bêdeng bimînin. Ez bang li gelên cîhanê jî dikim ku hevaltiya mezlûman bikin. Werin em ji bo doza vî gelî mezlûm bi hevre hereket bikin.”
‘QEYÛM XESPKIRINA ÇAVKANIYÊN GEL E’
Pişt re Parlementerê HDP’ê yê Mûşê Mensûr Işik jî diyar kir ku gelê kurd qeyûman qebûl nake û got: “Qeyûm xespkirina çavkaniyên gel e. Tayînkirina qeyûm bertilxwarin, bêqanûnî û dizî ye." Işik bal kişand ser teqîna li Pasûrê jî û got dibe ku ev jî wek bûyera di salên 90'î de ya li Basayê be. Işik got pişt re derket holê ku bûyera li Basayê dewletê kiriye û belkî ev bûyer jî bi provokasyonî hatibe kirin.
‘EM QEYÛMAN QEBÛL NAKIN’
Serokê Rêxistina Partiya Komînîst a Kurdistan a Semsûrê Mustafa Korkmaz jî da zanîn ku wek şoreşgerên kurd van qeyûman qebûl nakin û diyar kir ku heke bibin yek wê qeyûman ji ser vê axê bişînin.
Piştî axaftinan girseyê çalakiya rûniştinê li dar xist.
ENDAMÊN MECLÎSÊ NEGIRTIN ŞAREDARIYÊ
Piştî çalakiya rûniştinê Endamên Meclîsa Şaredariya Bajarê Mezin a Amedê daxuyaniya çapemeniyê li dar xist. Li ser navê meclîsê Gulseren Akkun da zanîn ku bi endamên meclîsê ve çûn şaredariyê lê polîsan ew negirtine hundirê şaredariyê. Akkun diyar kir ku tenê 2 endamên meclîsê ketin hundir û bi Midurê Karên Nivîsan re hevdîtin kirine.
Endama Meclîsa Şaredariya Bajarê Mezin a Amedê parêzer Gulistan Ataş jî diyar kir ku beyanên bidevkî qebûl nakin û ew ê serlêdana sûc bikin.