AMED - Parlementerê HDP’ê yê Amedê Mûsa Farîsogûllari, bang li malbatên li pêş avahiya HDP'ê ya Amedê rûdinên kir û got: “Werin em bi hevre çareseriyekê bibînin. Bila hemû partî destê xwe têxin bin kevir. Em bi hevre çareseriyê pêş bixin û aşitiyeke mayînde pêk bînin.”
Rêxistina Partiya Demokratîk a Gelan (HDP) a Amedê, der barê malbatên ku li pêş avahiya HDP'ê ya Bajar çalakiya rûniştinê li dar dixin; li avahiya xwe civîna çapemeniyê li dar xist. Parlementerên HDP’ê yên Amedê Mûsa Farisogûllari û Salîha Aydenîz, Hevserokên Rêxistina HDP’ê ya Amedê Zeyat Ceylan û Hulya Uyanik Alokmen amade bûn. Di civînê de Mûsa Farisogûllari diyar kir ku bi salan e li dijî destkeftî û nirxên wan êrîşeke hovane berdewam dike û wiha got: “Herî dawî sê bajarên mezin ên Kurdistanê li Amed, Mêrdîn û Wanê hevşaredarên me ji peywirê hatin girtin. Qeyûm tayînî şûna wan kirin. Ji ber vê yekê tiştê ku niha cereyan dike ji bo ku rojev were guhertine, van tiştên ku bikartînin bi êrîşên xwe dipeçinin û ser digrin.”
'HERÎ ZÊDE EM ÊŞA MALBATAN FÊM DIKIN'
Farîsogûllari destnîşan kir ku malbatên li pêş avahiya wan rûniştî malbatên wan in wiha axivî: “Herî zêde em êşa van malbatan fêm dikin. Ji bo çareserî û aşitiyeke mayînde werin em bi hevre gavan bavêjin. Em dawi li polîtîkayên şer bînin em aştiyê peş bixin. Me bang li parlementoyê jî kir. Hemû partiyên komên wan di meclîsê de hene werin em bi hevre çareser bikin. Mirovên me, keç û xortên me jiyana xwe ji dest dane. Gelek jî winda ne. Vaye li Stenbol, Amed, Batman dayikên aşitiyê bi salane li ber xwe didin. Li Stenbolê jî Dayikên Şemiyê çalakiya xwe didomînin. 20-30 sal in zarokên wan winda nin. Hêj egihiştine hestiyên zaroken xwe jî. Em bang dikin ku bi hevre çareseriyekê bibînin. Em polîtîkayek demokratîk pêş bixin."