HEWLÊR - Şandeya ku Hevserokê Giştî yê HDP'ê Sezaî Temellî û Hevserokê KCD'ê Berdan Ozturk jî di nav de hene, bi Serokê PDK'ê Mesût Barzanî re hevdîtin pêk anîn.
Rayedarên paye bilind ên Partiya Demokratîk a Gelan (HDP) û Kongreya Civaka Demokratîk (KCD) ji bo ku li Herêma Federa ya Kurdistanê hin hevdîtinan pêk bînin, çûn Hewlerê. Şandeya HDP'ê ku ji Hevserokê Giştî yê HDP'ê Sezaî Temellî, Hevserokê KCD'ê û Parlamenterê HDP'ê yê Agiriyê Berdan Ozturk, Serokwekîla Koma HDP'ê û Parlamentera Mersînê Fatma Kûrtûlan, Cîgirê Hevserokê Giştî yê HDP'ê Nazmî Gur, Parlamenterê HDP'ê yê Amedê Îmam Taşçier, Hevberdevka Komîsyona Têkiliyên Derve ya HDP'ê û Parlamentera Êlihê Feleknaz Ûca û nûnerên HDP'ê yên Hewlerê Muzeyen Guneş û Abîd Îke pêk tê, bi Serokê Partiya Demokrata Kurdistanê (PDK) Mesût Barzanî re hevdîtin pêk anîn.
Hevdîtina ku li bajaroka Nesîf a navçeya Selahaddînê ji çapameniyê re girtî pêk hat, bi qasî 2 saetan berdewam kir. Piştî hevdîtinê Barzanî bi şandeyê re heta ber derî hat û ew verê kirin. Her du aliyan jî têkildarî hevdîtinê tu daxuyanî nedan.
Dê şande saet di 15.00'an de bi rayedarên Partiya Zehmetkêşanî Kurdistanê re hevdîtin pêk bîne.