STENBOL - Rojnamevan û nûnerên rêxistinên civaka sivîl, ji bo tayînkirina qeyûman diyar kirin ku bi tayînkirina qeyûman tê xwestin rejîma yekzilamî bê mayîndekirin û gotin: "Li dijî vê tenê rêyek li ber muxalefetê heye, ew jî têkoşîneke hevpar e."
Bertekên li dijî tayînkirina qeyûman didomin. Rojnamevan Rûgrûl Eryilmaz û Arîf Bûlût, Serokê Giştî yê Weqfa Aştiyê Hakan Tahmaz û Endamê Hewldana Ji Bo Demokrasiyê Yekîtiyê Nesteren Davûtoglû jî bertek nîşanî tayînkirina qeyûman dan.
‘VÎNA GEL HAT BINPÊKIRIN'
Rojnamevan Tûgrûl Eryilmaz, diyar kir ku îktîdarê sê şaredariyên bajarê mezin ên HDP'ê xesp kiriye û bi awayekî aşkere vîna gel bin pê kiriye. Eryilmaz, bilêv kir ku tenê rêyeke xelasiyê li ber Tirkiyeyê heye, ew jî bê şert û merc demokrasî ye û got: "Demokrasî bê şert û merc e. Eger wê asabûyînek çêbibe, ew jî divê tevahiya Tirkiyeyê asasayî bibe."
‘JI XEYNÎ TÊKOŞÎNEKE HEVPAR TU RÊ TUNE YE'
Serokê Giştî yê Weqfa Aştiyê Hakan Tahmaz, bilêv kir ku di warê çareserkirina pirsgirêka kurd de polîtîkayên ewlehîparêz di dewrê de ne û got, di vî warî de peywireke mezin dikeve ser milê hêzên muxalefetê û CHP'ê. Tahmaz, got: "Divê CHP ji bo Tirkiyeyê polîtîkayeke nû diyar bike. Ne mumkun e ku AKP ji bo çareseriyê gavina bavêje. Ji bo rewşeke asayî û ji bo pirsgirka kurd divê muxalefet gavina bavêje. Kesên ehlê demokrasiyê, kesên dûrî netewperestiyê û şer, divê bi nexşerêyeke hevpar polîtîkayekê diyar bikin. Pirsgirêka krud êdî tenê ne pirsgirêka Tirkiyeyê ye. Veguheriye prisgirêkek navnetewî. Divê Tirkiye êdî ji xeynî polîtîkayên ewlehîparêziyê hin polîtîkayên din diyar bike. Hemû destekên ji bo polîtîkayên ewlehîparêziyê bi kêrî AKP'ê tên û dibe sedema kûrbûna krîzê. Niha qeyûm tayînî 3 şaredariyên mezin hatine kirin. Bi vîa wayî tê xwestin ku rejîma yekzilamî mayînde bibe. Divê muxalefet vê yekê baş bibîne. Ji bilî helwest û têkoşîneke hevpar tu rê tune ye."
Endamê Hewldana Ji Bo Demokrasiyê Yekîtî Nesteren Davûtoglû jî got: "Tayînkirina qeyûman, tiştekî antîdemokratîk û kêfî ye. Ji bo gel tehrîk bikin dibêjin 'pereyan ji çiyê re dişînin.' Bawer dikim şaredar peywira xwe baş bi cih dianîn. Baweriya min bi demokrasiyê tê û divê her sê şaredar vegerin ser karên xwe."
Rojnamevan Arîf Bûlût jî, diyar kir ku di şaredariyên qeyûm tayînî wan hatine kirin de tu nelirêtî nehatine dîtin, lê belê qeyûmên tayînî şûna wan hatine kirin şaredarî heta qirikê xistine nav deynan û got: "Şaredariyên ji qeyûman hatin stendin lîsteyên deyann aşkere kirin. Ji ber van deynan li herêmê ji 31'Ê Adarê ve xweşikî xizmet nehatiye kirin. Eger li aqûbeta pereyan bê prisîn divê ev yek baş bê pirsîn. Tayînkirina qeyûman bi kêrî taşeronên di dema qeyûman de îhale digirtin û nelirêtî dikirin tê. Ev qeyûm li go xwesteka wan tên tayînkirin. Yanî tu eleqeya wan bi hezkirina ji bo welat û milet tune ye."
MA / Îrfan Tuncçelik