Sê malbatên ku îdîa dikin HDP'ê zarokên wan şandine çiyê, 3 roj in li ber avahiya Partiya Demokratîk ya Gelan (HDP) ya Amedê bi arastekirina polîsan rûniştinên. Polîsên ku bi awayekî tund êrîşî çalakiyên HDP’ê dike, mudahaleyî malbatên ku heqaret û êrîşî HDP’iyan dikin nakin. Hevserokê HDP'a Amedê Zeyat Ceylan der barê çalakiya li pêş avahiya HDP'ê axivî û da zanîn ku ev çalakî bi arastekirina polîsan tê kirin û tê xwestin bi vî awayî partiya wan bê krîmînalizekirin. 

 

DIXWAZIN HDP'Ê KRÎMÎNALÎZE BIKIN'

 

Ceylan bi bîr xist ku ji ber çaresernekirina pirsgirêka kurd 40 sal e 20 hezar mirovên ku kiryarên wan diyar û nediyar jiyana xwe ji dest dane û got, di vê pevajoyê de tu partiyên îktîdarê faîlên van cinayetan dernexistine holê. Ceylan destnîşan kir ku berprisiyaê hemû mirovên winda dewlet e û got: “Vî welatî di serdema AKP’ê ya 17 salan de bi hezaran can winda kirin. AKP, hêj hesaba van nedaye.” Ceylan diyar kir ku polîtîkayên AKP’ê yên şer, aborî û nehesibandinê di31’ê Adarê de ji aliyê gelan ve nehatin qebûlkirin û got: “AKP, wekî ku berpirsyarê hilbijartinê HDP be tev digere û ji ber vê yekê dixwaze HDP’ê krîmînalîze bike."

 

'SIYASETEKE TÊKILDARÎ DEREWAN E'

 

Ceylan da xuyakirin ku ji şer zêdetir tiştekî ku AKP bide civakê nîne û got, ev polîtîka jî AKP’ê ber bi hilweşandinê ve dibe. Ceylan bal kişand ser tayînkirina qeyûman a ser sê şaredariyên bajarê mezin û got, ji bo ku tayînkirina qeyûman ji rojevê derxînin malbatên zarokên wan windabûyî ber bi partiya wan ve dişînin. Ceylan, got: "Niha siyaseteke ku dixwazin partiya me krîmînalîze bikin û heçku partiya me zarokan dişîne çiyê dimeşînin. Ev siyaseta bêbextî û derewan e." 

 

'POLÎSAN BERÊ ME DA WIR' 

 

Ceylan, diyar kir ku polîtîkayên qirêj ên li hemberî partiya wan teşhîr bûne û got: “Ji malbatan yek jê dibêje, ‘polîsan em arasteyî vê derê kirin.’ Niha diyar e ku ev senaryoyek e û lîstik tê lîstin. Em ê vê lîstikê pûç bikin. Bi malbatan re tu pirsgirêkên me nîne. Berteka me ji bo ên berê wan dane vira." Ceylan, bertek nîşanî medyaya hawizê jî da û got: "Ji ber ku medyaya hawiz nikare nûçeyekê pêşkêşî civakê bike, bi hêzên ewlehiyê re bi hevkariyî tev digere û bêbextiyê dike û propagandayeke reş dike. Lê bila baş bizanbin tiştek ji vê dernakeve." 

 

Ceylan, destnîşan kir ku AKP ji bo ku ji partiya wan tolê hilîne serî li van polîtîkayan dide û got: “HDP’ê di hilbijartinan de li Kurdistanê piştevanî ji gel girt. AKP’ê jî li Rojavayê Tirkiyeyê darbe xwar û ji îktîdarê ket. Êdî ne desthilatdar e li Tirkiyeyê. Bi darê zorê li îktîdarê dimîne. Ji ber vê dixwaze tola xw hilîne. Vê jî bi rê û rêbazên cuda dike. Lê bi ser nakeve." Ceylan, li ser nûçeyên ku di çapemeniyê de li ser îddîayên rewşa ciwanên navbirî de hatine çêkirin got: “Partiyên ji kevneşopiya siyaseta kurd û HDP’ê tên 30 sal in li hemberî şer polîtîkayekê bi rê ve dibin û di aştiyê de israr dikin. HDP, bi polîtîkayeke li dijî şer tev digere. Ji bo ku zarokên me nemirin em di nava hewildanekê de ne. Di xeta me de guhertinek çê nebûye. Israra me ya ji bo siyaseta demokratîk didome. Xwestin me krîmînalîze bikin. Lê êdî civak ji van derewan bawer nake.”

 

'DI POLÎTÎKAYÊN ŞER ISRAR DIKIN' 

 

Ceylan, bal kişand ku heke îktîdaran pirsgirêka kurd bi rêbazên demokratîk û aşitiyane çareser bikira niha ew ê mijarên cuda niqaş bikirana û got: “Mixabin desthilatdariya niha ji ber berjewendiyên xwe aşitiya civakî û pirsgirêka kurd bi riya demokratîk û aşitiyane çareser nekirin. Ji ber vê yekê di polîtîkayên şer de tê israr kirin. Tenê ne kurdan hemû Tirkiyê winda kir.” Ceylan, derbarê helwesta polîsan de jî got: “Polîs girê dayî îktîdarê ne. Li gor daxwaza îktîdarê tev digerin. Dema çalakiyên wisa li hemberî partiyên din çê dibin polîs destûr nadin lê dema li partiya me çê dibin dêstûrê didin. Teqez e ku polîs berê wan didin li vir." 

 

'BI DEK Û DOLABAN NIKARIN CIVAKÊ BIXAPÎNIN'

 

Herî dawî Ceylan got: “Em ê bi hestiyarî tev bigerin. Em ê hewl bidin ku malbata qanî bikin. Em jî dê û bav in. Em dizanin dil çi ye. Heke bi rastî jî zarokên wan ne li holê bin û ev tiştekî hestiyarî bê, rêz û hurmeta me ji bo wan heye. Lê heke armanca wan, anîna ba hev a zarok û malabtên wan bûna, dê aştî pêk bianiyana. Her roj mirovên me jiyana xwe ji dest didin, dê kî hesabê wan mirovan bide. Ji ber wê yekê bi dek û dolaban nikarin civakê bixapînin. HDP jî destûr nade van polîtîkayên kirêt.”