AMED - Li bendê ye ku bi tevlîbûnek mezin, mîtina 1’ê Îlonê Roja Aştiya Cîhanê ya Amedê bê lidarxistin. Amadekariyên mîtingê, ber bi dawî ve diçe. Komîteya amadekar a mîtîngê, banga tevlîbûna mîtîngê li gel kir.
Partiya Demokrtîk a Gelan (HDP) û rêxistinên civaka sivîl, xebatên xwe yên amadekariya mîtînga 1’ê Îlonê Roja Aştiya Cîhanê ya li Amedê bê lidarxsitin, didomînin. Mîtîng wê bi şîara “Ji bo aştiya birûmet, çareseriya demokratî’ saeta 15.00’an li Qada Îstasyonê bê lidarxistin. Ji bo tevlîbûna mîtîngê li taxan civîn tên lidarxistin û belavok li dikandar û welatiyan tên belavkirin. HDP’ê û rêxistinên civak sivîl ji bo mîtînga sibe bê lidarxistin lez dan xebatên xwe. Waliyê Amedê Hasan Basrî Guzeloglû, biryara da ku gotinên “Qeyûm”, “Qesr” û “Şer” di dirûşmeyan de neyên berz kirin û hişyariya vê yekê kir. Komîteya amadekar û beşdarvanên mîtîngê banga tevlîbûna mîtîngê kirin.
DESTÛR JI BO GOTINÊN QEYÛM, ŞER Û QESRKA TUNEYE!
Serokê Komîteya Amadekar Sayît Demîr, diyar kir ku ew tax bi tax, kolan bi kolan xebatên xwe berdewam dikin û wiha axivî: “Nêzî 100 pankarten me amadekirin. Me bi gelek cihên Amedê ve kirin. Li navend û navçeyên Amedê me bi hezaran belavok belav kirin. Emê îşev jî amadekariyên teknîkî bikin. Emê alan bi qadê ve bikin. Lê destûr nedan gotinê qeyûm, şer û qesrê. Wê ji sê deriyan girse bikevin qadê. Divê deriyan de hevalên me yên erkdar hene. Di her deriyê de wê 2 parêzer û hevalên me hebin.”
Demîr, dest nîşan kir ku ew li bêndêne tevlîbûnek xurt ji bo mîtîngê çêbe û wiha got: “Hevserokê Giştî yê HDP’ê Sezaî Temellî, Hevberdevka HDK’ê Gulîstan Kiliç Koçyîgît û Hevşaredarê Bajarê Mezin ê Amedê Selçûk Mizrakli yê qeyûm tayînê cihê wî hat kirin, wê di mîtingê biaxivin. Hûnermend Mem Ararat û Şêrzat wê derkevin ser dikê. Em di mîtînga sibe de li dijî polîtîkayên qeyûman û şer dengê xwe bilind bikin. Emê li dijî qeyûm û şer, bi awayekê girseyî aştiyê pêşwazî bikin.”
'TEVLÎBÛNA JINAN GIRÎNGE'
Hevseroka Partiya Demokratîk a Gelan (HDP) ya Amedê Hulya Alokmen Ûyanik jî, diyar kir ku roja 1’ê Îlonê roja bilindkirina dengê aştiyê ye û wiha got: “Mirovahî herî zêde di vê rojê de hesreta xwe ya aştiyê tîne ziman. Em Kurd jî, ji ber şer û hilweşîna heyî, bi salane şatiyê dixwazin. Di 1’ê Îlonê de emê vê daxwaza xwe hîn zêde bilindtir bikin. Berî her tiştî tevlîbûna jinan a mîtîngê pir girînge. Di serê hemû pirsgirêkên civakî de, pirsgirêka jinê heye. Bi taybetî, em li bendêne ku jin li wê qadê hem doza mafê xwe bikin û hemû jî ji bo azadiyê di 1’ê Îlonê de, li qadê bin.”
Serokê Partiya Sosyalîst a Bindestan (ESP) yê Amedê Ramazan Karakaya jî, anî ziman ku sibe 1’ê Îlonê Roja Aştiya Cîhanê ye, lê mixabin em di cîhaneke aştiyane de najîn û wiha got: “Di serî de, li ser erdnîgariya me, Rojhilata Navîn xwîn dirêje. Her roj bi sedan zarok û jin tên qetilkirin. Disa bi tayînkirina qeyûmên Amed, Wan û Mêrdînê, vîna gelê me xesp kirin. Em bang li hemû gelê xwe dikin ku li dijî desthilatdariya xespkar, beşdarî mîtîngê bibin. Em hêvî dikin ku mîtînga sibe bibe wesîleya aştiya civakî.”