ÊLIH - Hevşaredarê Êlihê Mehmet Demîr li pêşiya şaredariyê bi gel re tayînkirina qeyûm şermezar kir û ev tişt got: "Dîsa yê ku qezenc bike dê gelê me be. Bila guman tu kesî ji ve yekê tunebe."
Tayînkirina qeyûman a şûna hevşaredarên Amed, Mêrdîn û Wanê, li pêşiya Şaredariya Êlihê hat şermezarkirin. Pêşiya çalakiya ku ji hêla Rêxistina Partiya Demokratîk a Gelan (HDP) a Êlihê ve hat lidarxistin, derora bînaya şaredariyê jim aliyê polisan ve hat dorpêçkirin. Ji bo çalakiyê hevaşredarên Êlihê Songul Korkmaz û Mehmet Demîr û cîgirên hevserokên bajar ên HDP'ê Îkram Îrgî û Gulcemal Erdînç li pêşiya şaredariyê hatin gel hev.
Girseya ku li hev kom bû polisan nehişt ku derbasî pêşiya şaredariyê bibin. Ji ber vê yekê di navbera girseyê û polisan de nîqaş derket. Li gel hemû astengiyan jî ji bo şermezarkirina tayînkirina qeyûman Cîgirê Hevserokê Bajar ê HDP'ê Gulcemal Erdînç daxuyanî da. Hevserok Erdînç hewlesta polisan rexne kir û ev tişt anî ziman: "Hûn bi rêbazên korsanvarî bêhiqûqiyê dikin. Heke hûn îro destûr nadin ku em li ber avahîya xwe daxuyanî bidin ev şerma we ye. Hûn bi tayînkirina qeyûman jî vîna gelê me tune dihesibînin, ev jî şerma we ye. Lê wê ev gel serî netewîne." Cîgirê Hevserokê Bajar ê HDP'ê yê din Îkram Îrgî jî li dijî tayînkirina qeyûman banga tekoşînê kir.
'DÊ GELÊ ME BI SERKEVE'
Hevşaredarê Êlihê Mehmet Demîr jî diyar kir ku tayînakirina qeyûman li dijî hiqûq, demokrasî û vîna gelên Tirkiyeyê darbe ye û wiha got: "Dema wî bê, kesên ku îro fermana qeyûman didin, dê sibê li hemberî zarokên xwe şerm bikin. Em dibêjin me hêza xwe ji bingeha adeletê girtiye. Em ê bi hevşaredarên xwe yên ku ji peywirê hatine girtin re bin û vê yekê bidomînin. Kesên ku qeyûm tayînkirinê dê di heriyê de bi fetisin. Dê vê carê li dîwara biqelibin." Demîr di berdewamê de tayînkirina qeyûm a ji bo şaredariya wan a sala 2016'an bi bîr xist û ev tişt anî ziman: "Dîsa yê ku qezenc bike dê gelê me be. Bila guman tu kesî ji ve yekê tunebe."