STENBOL - Nivîskar Aydin Engîn, bilêv kir ku di demeke ku Ocalan dibêje "Ez ji bo çareseriyê amade me" de kesên dewletê bi rê ve dibin qeyûman tayîn kirin û ev tê wateya ku dewlet bi awayekî cidî nêzî vî karî nebûye. Engîn, anî ziman ku dewlet bi gotinên "em ê bitepisînin, êrîş bikin, bin pê bikin" bersivê dide bangawaziyên ji bo aştiyê.
Bertekên li dijî bi qeyûûman desteserkirina şaredariya bajarê mezin a Amed, Wan û Mêrdînê didomin. Rojnamevan-nivîskar Aydin Engîn, bilêv kir ku bi tayînkirina qeyûman aşkere bûye ku kesên dewletê bi rê ve dibin ne ehlê çareseriyeke aştiyane ne.
Engîn, destnîşan kir ku bi tayînkirina qeyûmên dawî êdî çap bi serî bûn û got: "Ev tê wateya destavêtina demokrasiyê. Her wiha ev bi hêleke xwe jî ji bo hêzên demokrasiyê yên Tirkiyeyê rêya ezmûnek nû nîşan da. Kesên serketina li Enqere, Stenbol, Îzmîr, Antalya û Edeneyê wekî serketina demokrasiyê dibînin, divê tayînkirina qeyûmên li Kurdistanê jî wekî êrîşeke li dijî demokrasiyê bibînin. Partiya ÎYÎ ku perçeyeke tifaqa gel e, heta niha deng jê derneketiye. A rast ez heyr dimînin, lê belê di CHP'ê de jî ji xeynî çend dengê mizmizokî daxuyaniyeke rêxistinbûyî derneket. A rast niha ji daxuyaniyan wêdetir em di rojeke ku pêdivî bi çalakiyan heye de ne. Wê çi qas baş bûne di Îlonê de baro ne li Qesra Erdogan lê li Amedê bûna. Wê çi baş bûne şaredarên Enqere, Îzmîr, Stenbol, Edene, Hatayê û şaredarên din ku gotin 'me pozê AKP'ê firkand' destê xwe bidana destên şaredarên Amed, Wan û Mêrdînê. Wê ev ji bo demokrasiya me tiştek pir watedar be. Ev yek ji bo muxalefetê azmûnek e."
‘TEVGERA SIYASÎ YA KURD EHLÊ AŞTIYÊ YE'
Engîn, bilêv kir ku di demeke ku Ocalan dibêje "Ez ji bo çareseriyê amade me" de kesên dewletê bi rê ve dibin qeyûman tayîn kirin û ev tê wateya ku dewlet bi awayekî cidî nêzî vî karî nebûye. Engîn, destnîşan kir ku di tevgera siyasî ya kurd de tenê ne Ocalan hemû aktorên wê ehlê aştiyê ne û got: "Helbet tevgera siyasî ya kurd çareseriyê dixwaze. Lê belê ji liv û tevgera Erdogan a heta niha dixuyê ku ne ehlê çareseriyê ye. Ji bo vê gelek bûyerên şênber hene. Bi qeyûmên dawî yekcar xirab kir. Kesên dewletê bi rê ve dibin ji bo bangawaziyên der barê çareserkirina pirsgirêk kurd de dibêje 'Na, êdî em naxwaizn vê bi awayekî aştiyane çareser bikin, em ê bi awayekî leşkerî çareser bikin. Em ê bi darê zorê yê dewletê çareser bikin. Em ê bitepisînin, em ê êrîş bikin, em ê bin pê bikin.'"
MA / Ferhat Çelik