WAN - Mehmet Selîm Guleş ê li Navçeya Artemêtan rençberî û sewalkariyê dike, polîtîkayên hikûmetê yên çandiniyê rexne kirin û got: "Ji ber lêçûna çandiniyê zêde bûye êdî min sewalên xwe firotin. Ji bo heqê gubre û mazotê bidim min çêlek firot."
Ji ber krîza aborî zêde dibe herî zêde rençber û çotkar dikevin bin bandora krizê. Çotkarên ku çandiniyê dikin, ji ber heqê mazot û gubre zêde dibe êdî nikarin çandiniyê bikin. Li taxa Çîçeklî ya Navçeya Artemêtan a Wanê rençber Mehmet Selim Guleş yê 20 salîn karê rençberiyê dike, polîtikayên hikûmetê yên çandiniyê rexne kir û bertekên xwe anîn ziman. Guleş, li ser 5 dolim zeviyê nefel, ceh û genim diçîne. Ji bo sewalan xwedi dike pûşê ceh û genim dike ka û nefelê jî dike rêzî û dihêle zivistanê. Guleş, diyar kir ku sala par gurçek giha bi 3 TL û îsal bi 5 TL difiroşe û wiha got: "Lê dîsa nikarin heqê av, ceyran gubre derxim. Mazot, derman, gumbe duqat zêde bûye. Ji bo ez heqê derman, gubre û mazotê bidim min çêleka xwe firot. Hikûmet û dewlet alikarî û piştgiriyê nade rençber û sewalkaran.
Guleş, anî ziman ku li taxê her kes di nava krîzê de dijî û wiha got: "Dewlet û hikûmet piştgiriyê dane rençberan. Ger ku hikûmetê alîkarî dabûya rençber û çotkaran wê rewş ne wisa bûya. Ez dema salekê çêlekekê xwedî dikim lêçûna çêlekê 5 hezar TL ye. Lê ji ber ku lêçûn zêde ye, min çêlek firot. Sala par çêlekê min zêde bûn. Lê îsal min gelek firotin. Niha tenê 4 çêlekê min hene. Ez difikirim ku îsal 2 çêlekên din bifiroşim.
Guleş, destnîşan kir ku ji bo çandiniya zeviyê 700 TL pere werç kir û wiha bi dawî kir: "Sala par giha û pincar baş bû. Lê îsal ne baş e. Îsal giha tune. Wê buhayê gihayê pir zêde bibe. Em kedek mezin didin û heqê keda xwe nastinin. Her salê 540 TL heqê nerîna golik didim. Ez li nava zeviyê xwe perîşan bikim jî mehê nikarim 3 hezar tl bistînim. Rojekê kar dikim 10 roj betal im. Berê li pêş deriyê her malê 400-500 pez hebû, lê niha 10 mih tune ye.