COLEMÊRG – Sînem Kanat ku dev jiyana li bajêr berda û dîsa çû gundê xwe Qewalê, 10 sal in li gund bi tena serê xwe dijî. Kanat, hema bêje her tiştî ji xwezayê berhev dike û hezkirina xwe ya ji bo gund wiha bilêv dike: "Aramiyeke pir xweşik li min peyda dike."
Li Colemêrgê, di salên 90'î de ji ber valakirina gundan gelek kes ji mecbûrî berê xwe dabûn bajaran. Yek ji van kesan jî Sînem Kanat a 76 salî ye. Kanat, piştî salên dûr û dirêj dîsa vegeriya gundê xwe Qewalê. Gundê Qewalê nêzî Çiyayê Katoyê ye û Kanat 10 sal in bi tena xwe dijî. Kanat, bilêv dike ku ji ber ji jiyana li bajêr hez nekiriye hatiye gundê xwe û dibêje wexta ji bo berhevkirina pincaran dertê helîkopter û heron tim wê dişopînin.
JIYANA LI GUND PIR XWEŞ E
Sînem Kanat, bilêv dike ku zivistanê ji mecbûrî dîsa diçe bajêr û ji xeynî zivistanê bi tena serê xwe li gund dimîne. Kanat, tîne ziman ku her tiştî ji xwezayê berhev dike û li baxçeyê xwe zebze datîne. Kanat, diyar dike ku biharê ji çiyê karî, catirî û lûş berhev dike û hinekî ji bo zivistanê hiltîne û yên mayî jî difiroşe. Kanat, wiha behsa jiyana gund a berê dike: "Berê heywanên me hebûn. Em diçûn zozana, pir aram bû. Lê niha ne pezên me ne jî dewarên me hene. Berê em tim diçûn zozana bêrîvaniyê, me pezên xwe didot, penêr û mast çêdikir. Wê çaxê jiyan pir xweş bû. Niha ne wek berê ye lê belê dîsa jî jiyana li gund ji ya bajaran xweştir e."
'DEWLET NAHÊLE'
Kanat, bilêv dike ku wexta ji bo berhevkirina pincarê dertê helîkopter û heron tim wê dişopînin û dibêje: "Di biharê de em giyayên li derdora gund berhev dikin. Lê her cara ku em dertên li ser serê me helîkopter û heron diçin û tên. Dewlet li gund jî ti hizûr ji me re nehiştiye. Li çiyayên me giyayên wekî siyabo, bîk û gelekên din hene û tên xwarin. Lê ji tirsa helîkopter û heronan em nikarin biçin berhev bikin."
ARAMIYA LI GUND
Kanat, giyayên berhev dike hişk dike û dizane kîjan giya bi kêrî kîjan nexweşînê tê. Kanat, dibêje: "Min li ber mala xw ebaxçeyek çêkir û ji bo xwe zebze datînim. Îsal ziwahî hebû, pir şîn nehatin. Lê dîsa jî ez sebra xwe bi baxçe tînim. Li gund bi tena serê xwe dijîm. Aramiyeke pir xweşik li min peyda dike."
MA / Hamza Gunduz