Hevseroka Rêxistina DBP'ê ya Enqereyê Şukran Ercan têkildarî peyamên Reberê PKK'ê Abdullah Ocalan ku di hevdîtinên xwe yên bi parêzeran re bi raya giştî re parve kiribûn axivî û diyar kir ku divê hevdîtinên Îmraliyê bên berdewamkirin. Hevserok Ercan bi bîr xist ku piştî hilbijartinên Stenbolê serlêdanan parêzeran ên ji bo hevdîtina bi Ocalan re bê bersiv mane û wiha got: "Her hevdîtineke li Îmraliyê diê kêrî siyaseta demokratîk a Tirkiyeyê bê. Di hevdîtinan de rola girîng a Ocalan a ji bo siyaseta demokratîk hat dîtin."

 

'PÊWISTÎ BI RÊYA DEMOKRATÎK HEYE'

 

Ercan da zanîn ku Reberê PKK'ê Abdullah Ocalan rêberekî siyasî ye ku li Tirkiye û Cihanê pêşiya siyaseta demokratîk vedike û ev tişt anî ziman: "Zanîn û nêrînên wî her tim serkeftî bûne. Vekirina deriyên Îmraliyê bi gelê kurd û siyaseta demokratîk nefes daye berdanê. Weke ku Ocalan jî gotiye ji îro pê ve pêwistî bi bi rêya sêyemîn a demokratîk heye. Hilbijartinên giştî û herêmî nîşan dan ku ne tenê bi desthilata siyasî bi rêya sêyemîn jî Pirsgirêka Kurd dikare bê çareserkirin. Bi girseyên çepgir, sosyalîst û demokratîk jî dikare bê çareserkirin." 

 

Di dawiya axaftina xwe de Ercan bi bîr xist ku stratejiya HDP'ê ya Hilbijartina Stenbolê hemû hevsengiyên Tirkiyeyê serûbinê hev kiriye û bi van gotinan dawî li axaftina xwe anî: "Ocalan xwedî daneveke siyasî ye ku dikare hemû gelan bîne gel hev û divê ji Îmraliyê bê derxistin. Di çareseriya Pirsgirêka Kurd muxatab ne tenê AKP'ê ye, rêya çareseriyê dikare bi têkoşîna hevpar a hêzên demokrasî û kedê bê vekirin. Di Pirsgirêka Kurd kesên samîmî tevbigerin dê bi ser kevin. Heke CHP daxwaza rêveberiya welat dike divê di Pirsgirêka Kurd de samîmî tevbigere."