Di pêşengiya Meclîsa Ciwanên HDP’ê de duh li Amedê bi dirûşma “Ji şer re na, em di demokrasiyê de bên gel hev” dê ji ber avahiya Rêxistina HDP’ê ya Navçeya Peyasê heta Parka Roboskî meş bihata lidarxistin. Li ser biryara Walîtiya Amedê meş hat qedexekirin. Girseyê xwest bimeşin lê polîsan bi tundî mudaxele kir. Di rageşiya qewimî de polîsan Parlamentera HDP’ê ya Amedê Dersim Dag û şêwirmenda wê Leyla Akgul û şêwirmendê Parlamenter Salîha Aydenîz, Omer Aksoy binçav kir. Piştî saetek di wesayîta binçavkirinê de hatin hiştin berdan. 

 

Parlamentar HDP’ê ya Amedê Salîha Aydenîz jî bertek nîşanî helwesta polîsan da, di vê navberê de polîsan li Aydenîz da û şidetê pêk anîn.

 

‘BERPIRSÊ ŞIDETÊ WALIYÊ AMEDÊ YE’ 

 

Aydenîz a ku ji roja bûye parlamenter heta niha polîs lê didin axivî û helwesta Waliyê Amedê rexne kir û got: “Walî berpirsê vê şideta li dijî me pêk tê ye. Polîs ji walî fermanê digirin û ew jî êrîşî me dikin. Polîs her ku li me didin tên parastin. Li gorî zîncîrek fermanê tevdigerin. Walîyê Amedê naxwe û venaxwe serê her kêliyê biryarek qedexeyê datîne pêşiya me. Dem bi dem derketina me ya ji avahiya partiya me ya bajêr jî qedexe dikin. Walî ji fermanên hin kesan re katîbiyê dike. Ne walî ye qey mirov dibêje katib e. Bepirsê her tişta li vî bajarî diqewime walî ye. Dizane biryarên qedexeya dide jî li dijî hiqûqa vî welatî ne. Îktîdarê welat veguherandiye qada şidetê. Bepirsê van şidetan bi rêzê îktîdar, walî û emniyet e.” 

 

RAPOR WERGIRTIN 

 

Aydenîz û şêwirmendê xwe Omer Akosy ji bo rapora lêdanê werbigirin çûn nexweşxaneyê û raporên lêdanê wergirtin. 

 

DÊ GILIYÊ SÛC BIKIN 

 

Aydenîz da zanîn ku ew ê li dijî şideta li wan hatiye kirin giliyê sûc bikin. Parlamenter Dersim Dag jî anî ziman ku ew ê derbarên polîs û midûrên wan de giliyê sûc bikin.