Qeymeqam Kerem Suleyman Yuksel ku qekî qeyûm tayînî Şaredariya Bismil a Amedê hatibû kirin, avahiya nû ya şaredariyê ku bi 12 milyonan hatibû çêkirin bi avahiya Midûriyeta Emniyetê ya Navçeyê pevguherandibû. Li ser vê Midûriyeta Emniyetê ya Navçeyê derbasî avahiya nû bû, lê belê avahiya emniyetê ya berê jî bêyî tiştekî tahsîsî Emlaka Netewî hatibû kirin. Piştî tahsîsî Emlaka Netewî hat kirin dest bi rûxandina avahiyê hatibû kirin. Her wiha qeyûm 4 erseyên şaredariyê jî tahsîsî Emlaka Netewî kiribû û 2 wesayîtên şaredariyê jî bêyî bedêl tahsîsî Weqfa Alîkariyê ya Civakiyî ya Qeymeqamtiya Bismilê kiribû. 

 

MECLÎSA ŞAREDARIYÊ BETAL KIR 

 

Piştî HDP'ê di hilbijartina 31'ê Adarê de şaredarî bi dest xist, Meclîsa Şaredariya Bismilê di civîna xwe ya meha HEzîranê de ji bo tiştên hatine tahsîskirin û pevguherandin biryarên berê qeyûm dabûn betal kir. Meclîsa şaredariyê vê biryara xwe ji Qeymeqamtiya Navçeyê re şand. Lê belê Qeymeqam Kerem Suleyman Yuksel biryara meclîsa şaredariyê pesend nekir û ji bo betalkirina wê serî li Dadgeha Îdareeyê da. Her wiha Meclîsa Şaredariya Bismilê jî ji bo biryara wê pêk bê serî li Dadgeha Îdareyê da. 

 

Hevşaredarê Bismilê Orhan Ayaz, diyar kir ku wan di civîna xwe ya meha Hezîranê de biryar girtiye û rûxandina avahiya kevn a emniyetê dane sekinandin û got: "Me biryara xwe ji qeymeqamtiyê re şand. Lê belê qeymeqamtî bi awayekî bêhiqûqî îtiraz kir. Niha ev biryara me li dadgehê ye. Em ê li gor berjewendiyên gel tev bigerin. Em ê li gor biryara hiqûqê tev bigerin û em dixwazin her kes rêzê nîşanî biryara ku ji aliyê hiqûqê ve bê girtin bide." 

 

Ayaz, diyar kir ku niha şaredarî karê xwe li avahiya Navenda Çandê ya Jinê dike, lê belê ev avahî têra navçeyê nake. Ayaz got: "Bi awayekî fermî nifûsa Bismilê 120 hezar e. Lê di havînê de nifûs dibe 150 hezar. Ji ber avahî biçûk e di warê yekeyên şaredariyê de pirsgirêk rû didin. Em di wê avahiyê de asê amne, em nikarin ji bo gel bibin bersiv. Em dixwazin erse, avahî, amûr û alavên me yên hatne xespkirin bên dayîn." 

 

MA / Fethi Balaman