Şaredariya Sêrtê, ji bo zarokan ber bi werzîşê ve teşwîq bike Dibistanên Havînê yên Werzîşê vekirin. Li van dibistanan wê zarok di warê avjenî, basketbol, futbol, jîmnastîk, bale, zûmba û folklorê de bên perwerdekirin. Heta niha 900 zarokên temenê wan di navbera 6-14 salan de qeyda xwe çêkirin û wê perwerdehî heta 9'ê Îlonê dewam bike. 

 

Endamê Meclîsa Şaredariya Sêrtê ûgûr Çakaz der barê van dibistanên navbirî da agahî parve kirin û diyar kir ku armanca wan ew e ku di serdemên betlaneyê de zarok ji tiştên xirab dûr bikevin û wan ber bi werzîşê ve teşwîq bikin. Çakaz, destnîşan kir ku ji bo civakîbûyîna zarokan zêdetir bibe wan ev dibistan vekirine û di dema qeydan de wan tercîhên zarokan esas girtine. 

 

Çakaz, anî ziman ku eleqeya ji bo kursên futbol û basketbolê zêde ye û cara ewil e kursa baleyê hatiye vekirin û 40 kesî qeyda xwe çêkiriye. Çakaz, da zanîn ku ji bo dibistanên havînê yên werzîşê wan kontejanek diyar nekiriye. 

 

Her wiha Çakaz, diyar kir ku ji ber eywana wan a werzîşê ya girtî tune bûye wan nikaribûye ji bo voleybol, hentbol û tenîsa kortê kursan bidin destpêkirin. Çakaz, anî ziman ku wna ji bo vê ji Walîtiya Sêrtê doza eywaneke girtî kiriye, lê belê walîtiyê nedaye wan.