Li navçeya Amûdê ya girêdayî Qamişlo, Navenda Lêkolîn a Staratejiya Rojava (NRLS), ku li ser mijara DAIŞ’ê komxebatek (forum) navneteweyî organize kir, di roja sêyemin de berdewam dike. Ji 15 welatên ku bi sedan kesên navdar tevlî komxebatê bûne. Encamên bandora ku terora DAIŞ’ê daye avakirin bi her awayî li ser nîqaş dikin. 

 

Dê îro jî li ser pirsgirêka DAIŞ’ê û hiqûqa DAIŞ’ê çareserî û pêşniyar bên nîqaşkirin. Pişt re jî dê encamnameya forumê bi raya giştî re bê parvekirin. Gellek rojnamegerên bi nav û deng jî forumê şopandin. Rojnameger ji Tirkiyeyê jî beşdarî forumê bûn û şopandin. 

 

Rojnameger Ergun Babahan, Erk Acar û Hayko Bagdat li ser darizandina DAIŞ’iyan ji ajansa me re axivîn. 

 

ACERER: DIVÊ DAIŞÎ LI VIR BÊN DARIZADIN 

 

Ji rojnamegeran Erk Acarer diyar kir ku her çiqas dawiya eskerî û şer a DAIŞ’ê hatibe jî lê rêxistina selefi ya bîrdozî dewam dike û bal kişand ser girîngiya dê DAIŞ’î çawa bên darizandin. 

 

Acarer diyar kir ku di vê mijarê de sê xal tên nîqaşkirin û ji bo hemû DAIŞ’î li Rojava girtî ne divê pêşiya darizandina wan bê vekirin. Acarer anî ziman ku ya rast jî ew e ku li Rojava bên darizandin û çimkî sûcê şer li vê herêmê kirin. 

 

‘ASTENGIYA MEZIN NEBÛNA DADGEHEK FERMÎ YE’ 

 

Acarer da zanîn ku astengiya li pêşiya endamên DAIŞ’ê ya mezin ew e ku heta niha pêvajoyek dadgehek fermî pêk nehatiye û got: “Gellek DAIŞ’î biyanî ne û dixwazin li welatên xwe bên darizandin. Tabî Tirkiye jî heye. Meseleyeke gellek îronîk e. DAIŞ’iyên ji Tirkiyeyê dibêjin ‘em dixwazin li welatê xwe bên darizadin.’ Lê li vir kevanekek vedibe û heke em vê kevanekê vekin, heta îro çend DAIŞ’î girtî ne, çend kes hatin girtin û berdan û piştî hatin berdan tevlî kîjan sûcî bûne kêm hindik em dizanin. Em dizanin ku dewletê di vî warî de qeydan negirtiye. Pir eşkere ye ji bilî operasyonê mezinkirinê tu tiştek nekirine.” 

 

‘HÊJ METIRSIYÊN DAIŞ’Ê HENE’ 

 

Acarer di axaftina xwe de bal kişand ser darizandina DAIŞ’iyan û got: “Pêkane ku wan bibin welatê wan bidarizînin. Lê li pêşiya vê astengiyên mezin hene. Belge û sûcên şer hemû bi delîlên xwe li Rojava ne. Zor tê dîtin ku hiqûqnas û dadgeh ji hundirê vî karî derkevin. Raste rewşa wan a eskerî ku şer bikin bidawî bû. Ancak di warê bîrdozî de hêj xilas nebûne. Dibe ku ev rêxistin veguhere navek din jî. Rewşek ku rêxistinek tundttir jî were heye. Wek eskerî xilasbûne lê ya girîng zîhniyeta wan e. Zîhniyeta selefi ye. Ya rast heta ku îslama siyasî neqede dê rêxistinên wek DAIŞ’ê jî qet xilas nebin. Ev yek jî ne mimkin e. Ji bo vê yekê karên girîng dikevin ser milê me hemûyan. Divê em civakê hişmend bikin.”

 

BAĞDAT: PÊVAJOYA PIŞTÎ DAIŞ’Ê TÊ AXAFTIN 

 

Rojnameger Hayko Bagdat jî da zanîn ku ji bo hatina herêmê ew dereng maye û demek dirêj bû wî dixwest biçe li wir rastiyan bişopîne û ji ber li Rojavaye gellek bextewar e. 

 

 

Bagdat anî ziman ku bi rojan bû ew bi rê de bûn, rêveberiya PDK’ê wan asteng dikir û vê astengiyê jî li ser daxwaza hikumeta Tirkiyeyê pêk dainîn. 

 

Bagdat destnîşan kir ku di forumê de gelek mijarên girîng hatin nîqaşkirin û got: “Bi belgeyan zordestî û hovîtiya DAIŞ’ê ya li dijî civakan tê axaftin. Li ser pirsgirêka dê DAIŞ’î çawa bên darizandin û rûxandinên kirine tê axaftin û nîqaşkirin." 

 

‘ÇIMA TIRKIYE ACIZ E?’

 

Bagdat da zanîn ku Tirkiye ji van mijarên têkildarî DAIŞ’ê aciz e û got: “Çima Tirkiye ji vê aciz e? Çima nûnerên dewlet û hikumeta Tirkiyeyê li vir tune ne? Sedemê Tirkiye ji civînek wiha ditirse çi ye? Ev ne tirsa gelan e, tirsa dewlet û îtîxbarata tirk e. Divê ne gel, dewleta tirk bi rastiya DAIŞ’ê re hevrû bibe. Kî destekê da DAIŞ’ê û li dijî kurdan û Rojava dijminahiyê birêve bibir divê ew hesab bidin. Divê însanên li Tirkiyeyê jî vê daxwaz bikin. DAIŞ pirsgirêka hemû cîhanê ye. DAIŞ têk çû lê metirsiyên wê hene. Di serî de Neteweyên Yekbûyî divê hemû sazî û dezgehên navnetewî ji bo darizandina DAIŞ’iyan rola xwe bînin cih.” 

 

BABAHAN: KESÊN DESTEK DAN DAIŞ’Ê JÎ DIVÊ BÊN DARIZANDIN 

 

Rojnameger Ergun Babahan jî destnîşan kir ku siyasetmedar, akademîsyen, rojnameger, mirovên zana, pispor û gellek kesên girîng li ser axa pir çandî ji bo carek din DAIŞ neyê ser vê axê hatine ba hev nîqaş dikin û got: “Çawabûna darizandina DAIŞ’iyan tê nîqaşkirin. Divê DAIŞ’î teqez bên darizandin. Heke dadgehek navnetewî bê avakirin jî lê divê bi du alî be. Ya ewil divê kadroya di rêveberiya DAIŞ’ê de cih girtin û fermana her tiştî dan, kes, sazî û walatên destek dan DAIŞ’ê li pêşberî daraza navnetewî bên darizandin û hesab bidin. Ev tişta dibêjim zor e lê rastiya wê ev e. Hêzên ku li pişta DAIŞ’ê bûn hene. Ev hêz ji Tirkiyeyê, Katar û DYA’yê bûn. DYA û welatên Ewrûpa piştî ku rastiya DAIŞ’ê dîtin desteka xwe paş ve kişandin û di vî warî de Tirkiye jî hişyar kirin. Ancak Erdogan û koma xwe hişyariyê piştguh kirin. Têkiliya Tirkiye û Amerîka ji wê şûn ve pûç bû. Dadgehên navnetewî jî di esasê xwe bi guman li meseleyê dinêrin. Gumana wan heye ku rojek eskerên wan ên li dehan cihên herêmê cih digirin bibin hedefa dadgehê. Tenê ne niha. Ji operasyonên muhtemela siberojê bikeve metirsiyê jî ditirsin. Wek şerê li Borsa Hersekê. Tiştên wê demê li wir qewimîn dikarin ji bo Rojava mînak nîşan bidin.” 

 

 

MA / Nazim Daştan