MÊRDÎN – Ramazan Toksoy û Abdûlsamet Akgul, ji ber hatibûn îxbarkirin xwestibûn ji welat biçin, lê li Newala Qoriyê hatibûn bombebarankirin û kuştin. Ji ber xizmên wan gotibûn di kuştina wan de tiliya Şaredarê AKP'î yê Kerboranê heye, qereqolê gazî wan kiriye û gef li wan xwariye.
Di 16'ê Hezîranê de li Newala Qoriyê ku di navbera Kerboran a Mêrdînê û Hezex a Şirnexê de ye, di navbera leşkeran û HPG'iyan de şerek qewimî û leşkeran herêm bombebaran kiribû. Piştî vê Serdozgeriya Komarê ya Êlihê der barê bavê 5 zarokan Ramazan Toksoy û Abdûlsamet Akgul de lêpirsîn dabû destpêkirin û xwestibû her du bên girtin. Lê belê derketibû holê ku Toksoy û Akgul her du jî di bombebaranê de jiyana xwe ji dest dane. Lê belê demek berê leşkeran avêtibû ser mala Akgul û Toksoy a li gundê Werzîkê yê Kerboranê û hatibû gotin ji bo neyên binçavkirin li herêmê xwe veşartine û xwestine derbasî Herêma Kurdistana Federe bibin.
ŞAREDARÊ AKPÎ SOZ DABÛ KU WÊ BIRYARA GIRTIN BETAL BIKE!
Hîn jî têkildarî mijarê rayedaran tiştek engotiye. Lê belê der barê rewşa Akgul û Toksoy de îdiayên ecêb tên gotin. Li gorî agahiyên xizmên wan dan; beriya hilbijartina 31'ê Adarê Mehmet Cuneyt Aksoy ê ji AKP'ê bû şaredar û hin fermandarên cendirme jî di nav de heyetek diçe gundê Werzîkê. Tê gotin heyeta navbirî ji gundiyan re gotiye ger 30 jis edî deng bidin AKP'ê ew ê biryara girtinê ya li ser Toksoy û Akgul rakin. Hat destnîşankirin ku heyetê ji gundiyan re gotiye tenê di hilbijartina herêmî de deng bidin AKP'ê û li ser vê welatiyan jî ji heyetê xwestiye baweriyekê têxên destê wan.
Hat bilêvkirin ku namzetê AKP'î Mehmet Cuneyt Akasoy, beriya hilbijartinê Toksoy û Akgul girtiye cem xwe û li îstasyoneke petrolê bi cendirmeyan re hevdîtin çêkiriye. Hat diyarkirin ku li vira li GBT'ya Toksoy û Akgul hatiye nêrîn û biryara girtin û binçavkirinê ya li ser wan hatiye rakirin. Li ser vê Toksoy û Akgul jî plana xwe ya ji bo derkevin derveyî welat betal dikin. Di hilbijartinê de 50 ji sedî deng ji AKP'ê re çûn. Lê belê piştî hilbijartinê aşkere dibe ku biryara girtinê ya li ser her du kesan nehatiye rakirin û li ser vê her du kes careke din hewl didin derkevin derveyî welat.
Toksoy û Akgul, ji bo ji welat derkevin li herêmê xwe di şikeftekê de veşartin. Lê ji ber şerê li herêmê û bombebarankirina herêmê her duyan jî jiyana xwe ji dest da. Li ser vê malbatan bertek nîşanî şaredarê AKP'î Aksoy dan, ji ber ku soza xwe bi cih neaniye. Piştî vê qereqolê gazî xizmên Toksoy û Akgul kirin û cendirmeyan gef li wan xwar û ji wan xwestin ku ji Aksyo lêborînê bixwazin. Hat hînbûn ku wê xizmên Toksoy û Akgul giliyê kesên tiliya wan di vê bûyerê de heye bikin.
MA / Ahmet Kanbal