Siyasetmedarê Kurd û Serokê Partiya Kedê ya Gel (HEP) yê Amedê Vedat Aydin, 28 sal berê hat înfazkirin. Vedat Aydin jî di nava dosyayên "Faîl nediyar" de cihê xwe girt. Di salên 1990'î de bi sedan siyasetmedar û pêşengên Kurd hatin revandin û hatin kuştin. Yek jî pêşengê Kurd jî Vedat Aydin bû. Aydin, ji bo Komemela Mafên Mirovan (ÎHD) ava bike ket nava hewldanan. Di heman salê de bû Serokê Şaxa ÎHD'ê ya Amedê. Di 28'ê Cotmeha 1990'an de ji ber di Kongreya Navenda  Giştî ya ÎHD'ê de bi Kurdî axivî hat girtin û 2 mehan girtî ma. Aydin,  piştre di sala 1991'an de di kongreya HEP'ê ya Amedê de bû serokê HEP'ê yê Amedê. 

 

DI 5'Ê TÎRMEHÊ DE HAT REVANDIN DI 7'Ê TÎRMEHÊ DE CENAZEYÊ WÎ DÎTIN

 

Aydin piştî bû Serokê HEP'ê di 5'ê Tîrmeha 1991’an de ji aliyê kesên çekdar ên xwe wekî polîs dan naskirin ve hat revandin. Aydin piştî ji malê binçavkirin û şûnde di 7'ê Tîrmehê de li navçeya Madenê ya Xarpêtê cenazeyê wî hat dîtin. Dema cezayê Aydin dîtin, li ser bedena wî şopa îşkenceyê hebû. Cenazeyê Aydin di 10'ê Tîrmehê de li Goristana Deriyê Mêrdîn hat definkirin. Bi sed hazaran kes tev li merasima cenazeyê Aydin bûn. Polîsan êrîşî merasima cenaze kiribûn û di êrîşa polîsan de 8 kesên beşdarî merasima cenaze bûn jiyana xwe ji dest dabûn. 

 

LI GEL DELÎLAN DOZ VENEKIRIN

 

Ji bo faîlên kuştina Vedat Aydin bên dîtin û darizandin gav nehatin avêtin. Di 3'ê Mijdara 1996’an de piştî qezaya Susurlukê rapor hat amadekirin. Di raporê de hat diyar kirin ku Vedat Aydin ji aliyê çeteyê di nava dewletê de xwe bi rêxistin kiriye hatiye kuştin. Lê der barê vê kuştinê de lêpirsîn nehat vekirin. Beriya 5'ê Tîrmeha 2011’an ku dem di ser dosyayê re derbas bibe, Îtîrafkarê JÎTEM'ê Abdulkadir Aygan têkildarî cînayetê Vedat Aydin de agahî parve kirin. Li ser vê yekê Dozgerê Komarê yê Amedê dest b lêpirsînê kirin. Lê her çend lêpirsîn vekirin jî doz nehat vekirin. 

 

28 SALIN DEWLET DIXWAZE SIYASETA KURD PERÇE BIKE

 

Siyasetmedarê Kurd û parlamenterê HEP'ê yê Şirnexê Selim Sadak, qala Vedat Aydin kir. Sadak anî ziman ku ji roja Vedat Aydin hat kuştin heta niha dewlet dixwaze siyaseta Kurd perçe bike û wiha got: "Aydin ji bo siyaseta Kurd kesekî pir girîng bû. Hem parazvanê mafên mirovan bû û hem jî siyasetmedarekî pir xurt bû. Vedat Aydin di Kongreya Navenda Giştî ya ÎHD'ê bi kurdî axivî û ji ber vê yekê hat girtin. Vedat Aydin bi axaftina Kurdî ruhek da gelê xwe. Aydin bi siyesat xwe di Kurdan de hişyariyek çêkir. Bi her awayî bû daxwaza gelê kurd û bû bersîv. Hevî û baweriya gelê Kurd bêtir xurt û bilind kir. Dewletê yekîtiya gelê kurd û pêşketina Kurdan a di siyasetê te tehamul nekir û Vedat Aydin kuştin. Faîlê Aydin diyar e. Ji 7 salî heta 70 salî hemû kes dizane ku faîl dewlet e. Dewletê bi Kuştina Aydin xwest rê li pêş hişyarkirina gelê Kurd bigire. Wê demê gelê amedê li Vedat Aydin xwedî derket. Dewletê li dijî kesên li Vedat Aydin xwedi derketin komkujî kir. Bi sedan mirov hatin binçavkirin. Lê dîsa gelê kurd xwe neda paş û têkoşîna xwe bêtir mezin kir. 

Niha êdî bi kuştin, binçavkirin û girtinê pirsgirêk çareser nabe. Rêya çareseriya vê yekê Rêya demokratîk e. Êdî heta vîna Kurdan neyê qebûlkirin tu pirsgirêk çareser nabe." 

 

MA / Ozgur Paksoy