Endamê Meclîsa Partiyê ya DBP'ê Erol Demîrhan, diyar kir ku kesek lê geriyaye û gotiye "ez îtixbaratvan im" û sîxurtî lê ferz kiriye. Li ser vê Demîrhan serî li Şaxa Komeleya Mafên Mirovan (ÎHD) a Edeneyê da û wê li Serdozgeriya Komarê ya Edeneyê giliyê kesê lê geriyaye bike. 

 

Demîrhan, anî ziman ku di 5'ê Tîrmehê de ber destê nîvro kesê lê geriyaye bi hejmara 0531... lê geriyaye û jê re gotiye "ez îstixbatavan im." Demîrhan, diyar kir ku kesê lê geriyaye jê re gotiye: "Merheba, Erol beg. Ez ji îstixbaratê li te digerim. Em dixwazin rû bi rû hevdu bibînin. Em te nas dikin. Em dizanin tu çi karî dikî. Em edebiyata welat, gel, Sakarya deynin hêlekê. Hûn di nav têkoşîneke ku bawer dikin mafdar e de cih digirin. Neyteke me yê em di vî warî de te qaneh bikin tune ye. Em dizanin çi agahî li cem te hene. Beramberî agahiyên li cem te pereyên li cem me. Tu agahiyan bide me, em jî pereyan bidin te. Em dixwazin bi te re bixebitin. Em rû bi rû hevdu bibînin." 

 

Demîrhan, anî ziman ku wî jî ji wî kesî re gotiye: "Çi agahî li cem min hebin, li cem we jî hene. Ez rêveberên navenda giştî ya partiyeke qanûnî me. Xebatên min hemû li gor çarçoveya qanûnî ya navenda giştî ne. Eger di xebatên min de tiştekî îllegal hebe, ji xwe çi hewce be wê dozger bike. Wê emniyet min bigire û pêvajoya qanûnî dest pê bike. Hevdîtina min a bi we re wê bibe hevdîtineke îllegal. Ez tiştekî wisa qebûl nakim." 

 

Demîrhan, anî ziman ku ji zûv de ye dewlet li hemberî tevgera siyasî ya kurd polîtîkayên wisa qirêj dixe dewrê, lê belê ev polîtîka bi tu awayî bi ser nakevin. Demîrhan, got: "Li gelek deran hevalên me yên partiyê tên girtin. Bi awayekî îllegal tên revandin, gef li wan tên xwarin. Hin jê bi şantajan re rû bi rû dimînin. Têkoşîna me têkoşîneke mafdar û qanûnî ye. Daxwazên me ne daxwazên veşarî ne. Daxwazên me daxwazên ji bo azadî û aştiyê ne." 

 

MA / Hamdullah Kesen