WAN - Li têketina Şaredariya Giyadînê, polîsan hevşaredar Betul Yaşar û Evren Demîr derb kiribûn. Hevşaredarên jin bertek nîşanî vê yekê dan û gotin, divê gel bi ruhekî seferberî xwedî li şaredariyan derkevin.
Li têketina Şaredariya Giyadîn a Agiryê, polîsan hevşaredar Betul Yaşar û Evren Demîr derb kiribûn. Hevşaredarên jin bertek nîşanî vê yekê dan û gotin, îktîdar şaredariyên HDP'ê bi dest xistine hezm nake.
'PÊKANÎNÊN FAŞÎZAN'
Hevşaredara Sûrê Fîlîz Bûlûttekîn, bilêv kir ku feraseta yekzilamî dixwaze bi mueyîdeyên faşîzan hebûna xwe di şer şaredariyan re bidomîne. Bûlûttekîn, diyar kir ku di 31'ê Adarê de gel bi vîna xwe şaredarî bi dest xistine lê belê îktîdar vê yekê hezm nake û polîtîkayên xwe yên şidet û zoriyê didomîne.
‘EM Ê BI PAŞ VE GAV NEAVÊJIN'
Bûlûttekîn, got: "Li navçeyeke wek Giyadînê hêzên dewletê ji hevşaredarên me re dibêjin 'em dewlet in, em her tişt in.' Lê gel bertek nîşanî vê yekê da. Wê li ber vê em ê bi tu awayî bi paş ve gav neavêjin û dev ji têkoşînê bernedin."
Hevşaredara Farqînê Naşîde Toprak jî diyar kir ku îktîdar şaredariyên HDP'î hezm nake. Toprak, destnîşan kir ku êrîşa li Şaredariya Giyadînê li wan hemûyan hatiye kirin û got: "Îktîdar, bi vê êrîşê xwestiye vîna gel a nikaribûye bi xespkirin û qeyûman bi dest bixe, dixwaze bêîrade bike. Gel li pişta hevşarearên Giyadînê ye. Ji roja ku amûra x-rayê li ber şaredariya me danîne, panzêr ji dora Şaredariya Farqînê naçin. Tacîzeke bi vî rengî heye. Ev yek dibe sedema nrihetiye gel û gel dibêje 'gelo qey ez têm şopandin?' Piştî demekê êdî gel guh nade vê rewşê. Em jî guh nadinê. Xebatên me didomin. Wê bi têkoşîna me ev taciz û zext biqedin. Êrîşa li Şaredariya Giyadînê hatiye kirin li me hemûyan hatiye kirin. Em ê bi tu awayî bi paş ve gav neavêjin."
‘DIVÊ EM BI RUHÊ SEFERBERIYÊ XWEDÎ LI ŞAREDARIYAN DERKEVIN'
Hevşaredara Cizîrê Berîvan Kûtlû jî diyar kir ku êrîşa hatiye kirin li vîna gel hatiye kirin û got: "Ji ber faşîzm li ber têkoşînê bêçare maye, îjar hewl dide bi awayekî din xwe nîşan bide. Li gelek şaredariyên me amûrên x-rayê hene. Dixwazin bi darê zorê destkeftiyên me ji me bsitînin. Ji ber nikarin bi ser bikevin pêkanînên derûnî dixin dewrê. Girêdayî vê gelê me li Stenbolê bi ruhê seferberiyê têkoşiya. Gel ji faşîzmê re got 'tu heta derekê dikarî bi zext û zoriyan bi ser gel de biçî, lê tu nikarî gel bitepisînî û vîna gel talan bikî.' Bi vê re em bêtir bi ser ketin. Ji niha û pê ve jî em ê tevî gel bitêkoşin. Divê li dijî polîtîkayên AKP'ê tevdîrên me hebin. Çawa em bi ruhê seferberiyê xwedî li hilbijartina Stenbolê derketin divê em bi heman ruhî xwedî li şaredariyên xwe jî derkevin."