Piştî hilbijartina 31'ê Adarê, Meclîsa Giştî ya Bajêr a Colemêrgê, têkildarî qedexekirina zozan û mêrgên li Colemêrgê yên bi salan e didomin pêşniyaznameyek berpêşî Walîtiya Colemêrgê kir. Di pêşniyaznameyê de hinceta qedexekirina zozan û mêrgan ji walîtiyê hat pirsîn û hat xwestin ku walîtî texrîbata ji ber qedexyan rû daye aşkere bike. 

 

Hevserokê Meclîsa Giştî ya Bajêr Nazmî Coşkûn, diyar kir ku bi salan e 31 herêmên di nav sînorê bajêr de hatine qedexekirin û di demên dawî de hejmara vê daketiye 5'an. Coşkûn, anî ziman ku wexta ew çûne gund gundiyan pir gilî kiriye û diyar kirine ku êdî nikarin derkevin derveyî gund. Coşkûn, got: "Ji xeynî vê ji ber li deverên qedexe tim koordînat tên dayîn gundî bi pirsgirêka ewlehiyê re rû bi rû dimînin. Ji ber vê me jî wek meclîs ev mijar daxilî nav rojeva xwe kir û me pêşniyaznameyek amade kir û pêşniyazname bi yekdengî hat qebûlkirin. Bi vê pêşniyaznameyê me pirsî ku herêmên tên qedexekirin kîjan in, di warê çandinî, turîzm û sewalvaniyê de xwedî tesîreke çawa ne." 

 

Coşkûn, bilêv kir ku wan di meha Hezîranê de pêşniyazname berpêşî walîtiyê kiriye lê belê hîn jî nehatiye bersivandin. Coşkûn, diyar kir ku wexta bê bersivandin ew ê bersivê bi raya giştî re parve bikin. 

 

Hevseroka Meclîsa Giştî ya Bajêr a Colemêrgê Nesîbe Gumuşlu jî têkildarî Zozana Berçelanê ku nêzî 3 sal in têketin û derketina wê girêdayî destûra walîtiyê ye axivî û got: "Zozana Berçelanê, ne zozaneke qedexekirî ye lê belê girêdayî destûreke taybet e. Ji bo vê em li bendê ne saziyên eleqedar ji bo vê tiştekî bêjin. Berê gelek saziyên fermî li vê herêmê mîhrîcan li dar dixistin. Em dixwazin hîn bibin ji bo çi têketin û derketina wê girêdayî destûra walîtiyê ye. Ji bo ev qedexe bi dawî bibin çi ji destê me bê em ê bikin." 

 

MA / Hamza Gunduz