AMED - Şaxa Komeleya Çandê û Cemxaneyê ya Pîr Sultan Abdal a Amedê di 26'emîn salvegera Komkujiya Otêla Madimakê de, 33 rewşenbîrên hatin şewitandin bi bîr anî. 

 

Şaxa Komeleya Çandê û Cemxaneyê ya Pîr Sultan Abdal a Amedê, bi boneya 26'emîn salvegera Komkujiya Otêla Madimakê ku di 2’yê Tîrmeha 1993’yan de tê de 33 rewşenbîr hatin şewitandin û kuştin, ji bo kesên hatine kuştin çalakiyeke bîranînê li dar xist. Endam û rêveberên HDP, CHP û ESP’ê, Endamên Komeleya Şêx Seîd, ÎHD û TÎHV’ê, nivîskar Şehmûs Dîken, Vecdî Erbay û Lal Laleş û gelek welatî beşdarî çalakiyê bûn. Di bîranînê de pankartên li ser “Madimak dê bibe muzeya şermê” , “Komkujiya Madimakê sucekî li hemberî mirovahiyê hatiye kirine” nivîsandî hatin daliqandin. Biranîn bi rêzgirtinê dest pê kir. 

 

'KOMKUJIYEKE ORGANÎZEKIRÎ' 

 

Serokê Şaxa Komeleya Çandê û Cemxaneyê ya Pîr Sultan Abdal a Amedê Cafer Kolûman, diyar kir ku 26 sal berê li nêv Sêwazê 33 mirov li ber çavê dewletê hatine kuştin û got: "Em tim û tim li ber zaliman sekinîn. Ev yek ji Kerbelayê heta niha didome. Komkujiya Otêla Madimakê, komkujiyeke plankirî û organîzekirî ye. Bi organîzekirina leşker, polîs, daraz, medya, şaredarî, hikumeta desthilatdaran û bi tetikkêşiya paşverûyên serdema navîn hatiye kirin.”

 

Kolûman, anî ziman ku li Roboskî, Cizîr, Sûrê û li gelek deverên erdnîgariya kurdan bûyerên derî hiqûqa gerdûnî, mafên mirovan û deîr wijdanî pêk hatin û got: “ Yên ku dewletê bi rê ve dibin bi polîtîkayên netewperestiyê, bi polîtîkayên gelan dikin dijminê hev dixwazin serdestiya xwe berdewam bikin." 

 

'EM Ê TÊKOŞÎNÊ MEZIN BIKIN'

 

Pişt re Serokê ESP’ê yê Amedê Ramazan Karakaya jî diyar kir ku li vê erdnîgariyê elewî bi gelek êrîşan re rû bi rû mane û got: “Ev êrîşên ku derdikevin holê di serî de gel anîne pêşberî hev û bi vî awayî bi ser ketine. Me yek ev li Roboskî, Pirsûs û li Enqerê dît. Ji bo tiştên bi vî awayî pêk neyên pêdiviya me bo rêxistina gelan heye. Em soz didin ku em ê alaya 33’yan bilind bikin û têkoşînê xurtir bikin." 

 

Pişt re Îbrahîm Halîl Erkûl, lawje gotin. Koma Semahê jî pêşî gul danîn ber wêneyên 33 rewşenbîran û paşê bi lawjeyan semah gerandin. 

 

Bîranîn bi lawjeyên hunermend Zîlan Tîgrîs bi dawî bû.