AMED – Malbata Mahmût Alinbay ku li Dersimê di pevçûnekê de jiyana xwe ji dest da, îdia kir ku di pevçûnê de "çekên kîmyewî" hatine bikaranîn û ji ber cenazeyê wan hatiye îşkencekirin wê gilî bike.

 

Di 22-23'yê Hezîranê de li navçeya Xozat a Dersimê di navbera leşker û HPG'iyan de pevçûnek rû da. Di pevçûnê de Mahmût Alinbay (Adnan Pîro), Cîhan Çelebî (Hakki Çemîşgezek), Mzlûm Atar (Sîdar) û Abdulkerîm Avras jiyana xwe ji dest dan. Ji ber cenazeyên HPG'iyan reş bûne û çermê wan diweşiya, malbatan diyar kir ku "di pevçûnê de çekên kîmyewî hatine bikaranîn" û gotin cenazeyên zarokên wan hatine îşkencekirin. 

 

ÎDIA: ÇEKÊN KÎMYEWÎ HATINE BIKARANÎN 

 

Ahmet Alinbay, bavê Mahmût Alinbay ku cenazeyê wî li navçeya Pîran a Amedê hat veşartin, bilêv kir ku wî li cenazeyê kurê xwe û yên din neriye, lê belê cenaze wekî komirê bûne û çermên wan diweşiyan. Alinbay, îdia kir ku di pevçûnê de çekên kîmyewî hatine bikaranîn. Bav Alinbay, destnîşan kir ku îşkence li cenazeyan hatbû kirin, çavê kurekî wî hatibû derxistin, mil, ling û diranên wî hatibûne şikandin û hin deverên wucûdê wî hatibûne jêkirin. Bav Alinbay, bilêv kir ku cenazeyê wan 4 rojan li derve hatiye hiştin û ew nexistine morgê. 

 

WÊ GILÎ BIKIN 

 

Bav Alibnay, diyar kir ku a hatiye kirin "wehşet e" û got: "Ên mirov bin vê yekê nakin. Ma îşkencekirina cenazeyan heyfstendin e? Bi rastî jî fêm nakim. Ev hovîtî ye. Her wiha ev sûcê şerî ye jî. Çi dibe bila bibe divê ji bo cenazeyan hurmetek hebe. Ji mirovahîbûna me şerme dikim. Em ê gilî bikin." 

 

Bav Ahmet Alinbay, bal kişand ser pêkanînên polîsan ên di dema veşartina cenaze de jî û diyar kir ku wan "sînordarkirina beşdarbûyîna ji bo merasîma cenaze" qebûl nakin. Bav Alinbay, got mafê her malbatê ye beşdarî merasîma cenaeyên xwe bibe û xwedî lê derkeve.