Li gorî dane û serlêdanên saziyên mafên mirovan, parêzer û malbatan zextên li ser girtiyan her diçe zêde dibin. Malbata girtîyê li Girtîgeha Tîpa T a Beşîkduzu ya Trabzonê Ozgur Sevîm, piştî bi kurê xwe re hevdîtin kirin bal kişandin ser  zextên li ser girtiyan. Malbata Sevîn anî ziman ku li girtîgehê gardiyan ji girtiyan re gotine "Ev der ne girtîgehe, dibistaneke leşkerî ye û hûn ê îtaat bikin". Malbatê anî ziman ku rêveberiya girtîgehê radyo, rojname, pirtûk û nameyan nadin girtiyan û mafên wan ên spor, pirtûkxane û sohbetê asteng dikin. Malbata Sevîm destnişan kir ku kurê wan Ozgur Sevîm di 27 Gulana 2016'an de di pêvajoya xweseriya cewherî de li Nisêbîna Mêrdînê di nava 12 zarok û 42 kesan de hat girtin û wiha got: "Dema Ozgur girtin demekê li Girtîgeha Tîpa E ya Mêrdînê ma. Piştre sirgûnî Girtîgeha Tîpa T a Tokatê kirin. 2 sal û 8 meh şûnde Sirgûnê Girtîgeha Tîpa T a Beşîkduzu ya Trabzonê kirin. Sevîm, 3 sal û meheke girtî ye." 

 

'HER YEK AVÊTINE ODEYEKÊ'  

 

Dayika Ozgur Sevîm Behiye Sevîm, piştî bi kurê xwe re hevdîtin kir, çavdêriyên xwe bi Ajansa me Mezopotmaya (MA) re parve kir û wiha got: "Dema kurê min Ozgur nû sirgunê Girtîgeha Beşîkduzuyê kirin îşkence lê kirin. Dema birin Trabzonê xwestin wî di lêgerîna tazî re derbas bikin û tekmîlê bidin. Xwestin li ser piyan jimartinê bidin. Li dijî van pêkanînan 18 rojan ketin greva birçîbûnê. Her yek avêtin odeyekê û xwestin hev nebînin. Herî dawî min di 10’ê hezîranê de hevdîtina vekirî kir. Em rastî pêkanînên xerab û zilmê hatin. Malbatên hevalên me xwestin rewşa me bipirsin. Lê gardiyanan nehişt û êrîş kirin. Xwestin em bi hevre sohmet nekin û em maseyên xwe ji hev qut bikin. Me jî got em hev dinasin. Zarokên me bi hevre girtî ne. Gardiyanan got 'qedexe ye' û destûr nedan em bi hevre bi axivin.  

 

'SAETÊN ME JI DESTÊ ME DERDIXIN'

 

Sevîm destnîşan kir ku kurê wê di hevdîtina dawî de gotiye "Dema em diçin baxçe saetên me ji destê me derxînin. Heftiyê carekê bi keyfî odeyên me lêgerîn dikin. Me û endamên FETO bi hevre derdixin ziyaretê. Dema em derdikevin hevdîtinê jî saetan ji me distînin. Em nizanin çiqas me hevdîtin kir. Radyo, rojname, pirtûk, nameyan nadin me, mafên me yên faaliyetên spor, pirtûkxane û sohbetê îhlal dikin." Sevîm diyar kir ku pirtûka Ozgur nivîsandî dixwaze bişîne derve ku were çap kirin lê destûr nadin û wiha got: "Pirtûkên hevalên wan dişînin û ne qedexene jî dibêjin qedexe ye û nadin. Dema dibin nexweşxaneyê jî zilmê û heqaretê li wan dikin. Şandina wan a revîrê dikin minet. Ser hewşa wan bi torê girtine. Di odeyên wan de kamera hene. Birayê wî Umîd ê li Girtîgeha Amedê 2 mehin name şandiye, lê hêj negihiştiye destê wî. Cihê îşkenceyê ye. Em dixwazin ev zilm bi dawî bibe" 

 

'GER ZILM BIDOME EMÊ DEST BI ÇALAKIYÊ BIKIN' 

 

Sevîm bibîr xist ku di hevdîtina dawî de gardiyanan gotin 'zû zû wextê we qediya.' û wiha berdewam kir: "Qaşo 45 deqîqe bû. Destûr nedan em xatir ji hev bixwazin. Zextên li ser girtiyan pir zêde ye. Wekî em ji welatekî din çûbin welatekî din. Kontrol pir zêde ne. Em jî welatiyê vî welatî ne. Di hevdîtinê de êrîşî me kirin. Piştî hevdîtinê girtî birin û derî hişk girtin. Em nîv saetê li wir dîl girtin. Mafê me bin pê kirin. Çima em nîv saetê li wir hepis kirin? Min ji bo vê binpêkirinê serî li Komeleya Piştevanî û Alikariyê ya Malbatên Girtiyên (TUAYDER) da. Dema em çûn hevdîtinê em rastî heqaretê hatin. Îşkenceyê li me dikin. Ji ber sirgûnê 2 salan min nikarî kurê xwe bidîta. Dixwazin malbatan perîşan bikin. Dixwazin malbat dev ji zarokên xwe berdin. Lê em tu car dev ji zarokên xwe bernadin. Heta dilopek xwina me hebe eme biçin. Ew îşkencêyê jî bidomînin emê dîsa biçin li girtîgehê têkevin grevê. Li vê girtîgehê dîtin û gotin ne yek e. Ger zilm bidome emê li pêş girtîgehê bikevin greva birçîbûnê." 

 

Sevîm herî dawî destnîşan kir ku di 26'ê hezîranê de bi Ozgur re hevdîtina telefonê kir û wiha axivî: "Kurê min qala neqeyiyên li wan tên kirin kir û got 'Heqaretê dikin. Mudaxaleya fîzîkî dikin. Li me dixin. Bi keyfî bi ser odeyê de girtin. Dixwazin em tekmîla jimarê bidin. Bi kuçikan li ser cilê me digerin û dixwazin em bertek nişan bidin ku êrîş bikin. Dest danîn ser lênûsk û pênûsên me. Her roj dibêjin 'Ev der ne girtîgehe" Ev der dibistaneke leşkeriye, hûn ê îtaat bikin.' Ewlehiya me tune. Bila parêzer bi lez eleqeder bibin.' Zilma li ser girtiyan pir zêde ye." 

 

Rayedarên girtîgehê jî îdîa red kir.