NAVENDA NÛÇEYAN - Parazvanên mafên mirovan û hiqûqnasan têkildarî roja penaberan li gelek navendan daxuyanî dan. Endamê Komîsyona Penaberan a Baroya Amedê Prz. Mehmet Zekî Gezer destnîşan kir ku li Tirkiyê 3 milyon û 900 hezar penaber dijîn û roj bi roj pirsgirêkên van kûrtir dibin. Gezer anî ziman ku li gorî rapora Komisertiya Bilind a Penaberan a Yekîtiyên Netewî (UNHCR) a 2018’an li cîhanê 70 milyon û 800 hezar mirov bê war in.
Parazvanên mafên mirovan û hiqûqnasan, bi minasebeta 20'ê Hezîranê Roja Penaberan a Cîhanê li gelek navendan daxuyanî dan.
AMED
Komîsyona Penaberan a Baroya Amedê têkildarî “Roja Penaberan a Cîhane” li avahiya xwe civîna çapemeniyê li dar xist. Endam û rêveberên baroyê beşdarî civînê bûn. Di civînê de Endamê Komîsyona Penaberan a Baroya Amedê Parêzer Mehmet Zekî Gezer anî ziman ku armanca îlankirina roja penaberan ewe ku li ser pirsgirêkên penaberan bê niqaşkirin û wiha axivî: “Li gelek welatên cîhanê di encama pevçûn, zilm û zextan de her roja diçe hejmara penaberan zêde dibe. Li gorî rapora Komisertiya Bilind a Penaberan a Yekîtiyên Netewî (UNHCR) a 2018’an li tevahî cîhanê 70 milyon û 800 hezar kes ji cihê xwe bûne. Ji van 15 milyon xwe spartine hinek dewletên din. Ji van kesên ku xwe xwe spartine hinek dewletan 5 milyon û 835 hezar Surî, 3 milyon Venezuelayî û 2 milyon jî Afgan in.”
'PENABERÊN LI KAMPAN RASTÎ PÊKANÎNÊN DIJMIROVÎ TÊN'
Gezer, bi lêv kir ku ji ber herêmên tampon ên Ewropayê penaber nikarin îltîcayî van herêman bibin û wiha got: "Kesên ku teşebusî îltîcayê dikin wek Alan Kurdî bi deh hezaran li deryayan jiyana xwe ji dest didin. Penaberên ku bikarin îltîcan bin jî di kempan de rastî muameleya derveyî mirovahiyê tên"
Gezer, bibîr xist ku li gorî daneyên Muduriyeta Giştî a Îdareya Penaberan a Wezareta Karêhundir di 16’ê Gulana 2019’an, li Tirkiye 3 milyon û 900 hezar penaberên qeyd kirî hene û wiha got: “Li Tirkiyê 3 milyon 606 hezar û 737 welatiyên Sûriyeyî, 169 hezar Afganî, 143 hezar Iraqî, 35 hezar Îranî, 4 hezar Somayî û 10 hezar jî yên din 3 milyon û 900 hezar penaber dijîn. Xebatên li Tirkiyê tên kirin ji bo penaberan zehf kêm dimînin. Roj bi roj pirsgirêkên van penaberan kûrtir dibin.”
STENBOL
Şaxa Komeleya Mafên Mirovan (ÎHD) ya Stenbolê jî bi minasebeta 20'ê Hezîranê Roja Penaberana Cîhanê li Taksimê daxuyanî dan çapemeniyê. Seroka Şaxa ÎHD'ê ya Stenbolê Gulseren Yolerî diyar kir ku li gorî UNHCR/ BMMYK li tevahiya cîhanê 70 mîlyon û 800 hezar mirov bê warin.
Yolerî, da zanîn ku penaberên koçî Tirkiye kirine jî li 81 bajarên Tirkiye belav bûne û wiha got: "Tenê li Stenbolê 504 hezar û 465 penaber dijîn. 101 hezar û 656 penaber li Antalya û 85 hezar û 904 kes li Enqereyê dijîn. Bi giştî 3 milyon û 613 hezar û 644 welatiyên Sûriye yên qeydkirî hene. 109 hezar û 262 li warên gerok dijîn. Em bang li hemû welatên cîhanê dikin ku ji bo penaber di nava şert û mercên mirovî de bijîn divê şertên koçberan baş bikin. Dîsa ji bo derbasbûna sînoran divê tedbîr bên girtin. Dîsa ji bo mirov kaçber nekin divê dawî li xizanî û şer bê. Divê pêdiviyên her kesî yên debarê wek hev bin."