WAN - Waniyan diyar kir ku li Stenbolê dê kurd careke din bersiveke pêwîst bidin AKP'ê û ji bo Ekrem Îmamoglû jî ev hişyarî kirin: "Hevîdarin ku piştî bibe desthilatdar neguhere"
Hilbijartinên Stenbolê ku ji aliyê Saziya Bilind a Hilbijartinê ve hatin betalkirin dê roja yekşemê bên dubarekirin. Gelê Wanê têkildarî hilbijartinan axivî û diyar kir ku divê kurd dengê xwe bidin namzetê CHP'ê Ekrem Îmamoglû.
'WANIYÊN LI STENBOLÊ DÊ BERSIVA PÊWÎST BIDIN AKP'Ê'
Welatiyê bi navê Nîhat Kûrt diyar kir ku Ekrem Îmamoglû li gel ku qezenc kiriye jî mazbataya wî jê stendine û wiha got: "AKP'ê paşê bi hîleyan hilbijartinê betal kir. Dema gel tiştek bixwaze, ev tişt nikare bê astengkirin û pêşî lê bê girtin. Li rojhişlat û rojava li kurd dibe bila bibe pêşiya serkeftinê nikare bê girtin. Gelê Stenbolê jî wiha difikire û dixwaze. Waniyên li Stenbolê dijîn li hemberî vê neheqiyê bersiva pêwîst bidin. Gelê kurd gelekî ku hatiye pelçiqandin. Tiştên li wir tên jiyîn dibîne. Mirov bê kar in. Dê waniyên ku li Stenbolê diJîn dê careke din bersiva pêwîst bidin."
'GEL ÎMAMOGLÛ DIXWAZE'
Welatiyê bi navê Mûsa Demîr diyar kir ku di hilbijartinên Stenbolê de dê edalet cihê xwe bibîne û ev tişt got: "Herkes dizane ku piştî hilbijartinê çi li hev geriyan. Dawiya vir, hîle û daleveriyê tuneye. Bêguman dê Îmamoglû careke din bê hilbijartin. Neheqiyeke mezin li Îmamoglû hat kirin. Gel Îmamoglû dixwaze. Lewre gel rastiya meseleyê dizane. Kes nikare bi zor û hêzê heqiyê pêk bîne. Pewîstiya edalet bi çi hebe dê ew ê pêk were. Bila AKP zanibe ku bi zorê xweşî nabe."
'EM ÊDÎ JI ERDOGAN BEZAR BÛNE'
Welatiyê bi navê Ferhat Dûman jî da zanîn ku dê kurd dengê xwe bidin Îmamoglû û wiha pêde çû: "HDP'ê di hilbijartinên 31'ê Adarê de piştgirî da Îmamoglû. De ev piştgiriya me careke din bidome. Em êdî ji Erdogan Bêzar bûne. Ji ber vê yekê em ê deng bidin Îmamoglû. Ji me re ne dîktator,mafê mirovan pêwîst e. Desthilatê heta îro ji pisrgirêkên kurdan re çareserî neditiye û dê nebîne jî. Çareserî di destê me de ye. Tu gel ji bo gelekî din çareseriyê nabîne. ji bo vê yekê divê em kurd yek bin. Dê qedera hilbijartinên Stenbolê kurd diyar bikin. AKP'ê sozên xwe yên beriya ku bê ser desthilatê dabû kurdan ji bîr kiriye. Dê Îmamoglû baş be. Hêvî dikim ku ew jî bibe desthilatdar gotinên xwe ji bîr neke."
'ÇIMA QEYÛMAN NEDARIZANDIN'
Welatiyê bi navê Huseyîn yuzer jî desteserkirin û tayînkirina qeyûman a ser şaredariyên Partiya Herêmên Demokratîk (DBP) bi bîr xist û ev tişt anî ziman: "Hevşaredarê me Bekîr Kaya mirovek pir paqiş bû. Lê ew avêtin girtîgehê. Tiştekî ji qeyûmên ku ji şaredariyan xwarin nekirin. Karê Erdogan girtina muxalîfên xwe ye. Çawa ku muxalîfan didarizîne bila alîgirên xwe jî bidarizîne em bibînin. Îmamoglû tê hezkirin. Difikirim ku dê Îmamoglû bi heqî nêz bibe. Hêvî dikim ku bibe desthilatdar neguhere."