AMED - 14 rêxistinên demokratîk û sivîl ên Amedê li gel partiyên siyasî, têkildarî peyama Rêberê PKK'ê Abdullah Ocalan a çareseriya demokratîk û aştiyane helwesta xwe aşkere kirin û bang li hemû rêxistinên Tirkiye kirin. Sazî û partiyan ji her kesi xwest ku li dora nirxên azadî û demokrasiyê kom bibin û gotin: "Werin em bi hevre Tirkiyeyek demokratîk ava bikin û têkoşîna vê yekê bilind bikin."
Kongreya Civaka Demokratîk (KCD), Partiya Demokratîk a Gelan (HDP), Partiya Herêmên Demokratîk (DBP), Tevgera Jinên Azad (TJA), Meclîsa Jinan a HDP'ê, Meclîsa Ciwanan a HDP'ê, Komeleya Jinan a Rosa, Komeleya 78'an, Komeleya Malbatên Girtiyan (TUAY-DER), Komeleya Piştevanî û Alîkariyê ya li Warê Şaristaniyê Xizmên Xwe winda kirine (MEBYA-DER), Înîsiyatifa Ekolojiyê, Komeleya Lêkolîna Çand û ziman a Mezopotamya (MED-DER) û Komeleya Hiqûqnasên Ji bo Azadiyê (OHD) jî di navde 14 sazî û rêxistinên sivîl û demokratîk bi armanca piştgiriyê bidin peyama Rêberê PKK'ê Abdullah Ocalan a têkildarî çareseriya demokratîk û aştiyane daxuyaniyek hevpar dan. Nûnerên partî, komele û rêxistinên Demokratîk li avahiya TUAY-DER'ê kom bûn û civîna çapemeniyê li dar xistin. Gelek nûnerên partî û rêxistinên demokratîk amade bûn. Beriya daxuyaniyê bidin polîsan li pêş avahiya TUAY-DER'ê tedbîrên mezin girtin. Li ser navê girsê Hevserokê DBP'ê yê Amedê Galîp Kandemîr daxuyanî da.
'RÊYA XELASIYA JI KRÎZÊ TÊKOŞÎNA DEMOKRATÎK E'
Kandemîr, diyar kir ku di dîrokê de şoreşa herî mezin li ser axa Anatoliyê û Mezopotamya pêş dikeve û wiha got: "Lê li gel vê şoreşa dîrokî hêzên emperyalist her dem serî li rê û rêbazên krîz û kaosê dide. Sedema vê krîz û kaosê jî ew kesên ku para xwe ji azadî û demokrasiyê negirtine ne. Ji komkujiya xwezayê heta komkujiya jin, çand, ekolojî hemû cureyên komkujiyê dimeşînin. Li dijî hêzên ku xwe bi tunekirinê xwedî dikin, em jî wekî kesên ku edalet, wekhevî, azadiyê dixwazin vê têkoşina avakirinê berdewam dikin. Ev têkoşîn, têkoşîna tarî û ronahiyê ye. Faşizm dixwazçe her qadê tarî bike. Li ser gelan faşizm tê ferzkirin. Di vê pêvajoyê de em bawer dikin ku pêwiste têkoşîna azadî, demokrasî û aştiyê divê bê navber berdewam bike. Li Rojhilata Navîn, Kurdistan û Tirkiye li dijî pergala yekperest ku xwe ji moderniteya kapîtalîst xwedî dike, divê em modela moderniteya demokratîk, lihevkirina civakî û perguala demokratîk xurt bikin û ava bikin. Rêya rizgarkirina ji vê krîzê, demokratîkbûna Tirkiye û Rojhilata Navîn e. Yên vê yekê bikin jî gelê me yê baweriya xwe ji aştî, demokrasî û azadiyê anîye. "
'EM DIKARIN BI VÎNA XURT Û HÊZA AQIL Û PALÎTÎK ÇARESER BIKIN'
Kandemîr, bal kişand ser peyama Rêberê PKK'ê Abdullah Ocalan ên çareseriya demokratîk û wiha axivî: "Em bawer dikin ku ger em bi vîna têr û tije ya ji bo azadî, wekhevî û demokrasiyê bimeşin emê bi ser bikevin. Em wekî sazî û rêxistinên demokratîk ên Amedê heta niha me têkoşîna bi biryar û xwedî vîn a bi hêz nişan da û ji bo demokratikbûna Türkiye em têkoşiyan. Em dixwazin vê vîna xwe dîsa li Amedê nîşan bidin. Birêz Ocalan di 6'ê Gulane de 7 xanên ji bo çareseriyê îlan kir. Diyar kir ku li Rojhilata Navîn û Tirkiyeyê rêya rizgariya ji krîzê ne şer û tundî ye. Dijberî vê yekê hêza nerm, ango rêya aqil, polîtîk û çandî ye. Bang li hemû rêxistinên demokratîk kiriye ku erk û rola xwe pêk bînin. Hem Deklarasyona 6'ê Gulanê û hem jî pêvajoya piştî Newroza 2013'an ji bo demokratîkbûna Tirkiye gav hatin avêtin. Hat xweztin ku bi rêya muzakereyan û ji tundiye dûr pirsgirêk bên çareserkirin. Bal kişand ser siyaseta demokratîk û lihevkirina civakî. Diyar kir ku bi rêya siyaseta demokratik û li hevkirina civakê hûn dikarin pirsgirêkê çareser bikin."
'EM BANG LI HER KESÎ DIKIN KU TEV LI TEKOŞÎNÊ BIBIN'
Kandemir, bal kişand ser tekoşîna Hevseroka KCD'ê Leyla Guven, hezaran girtiyen siyasî yên çalakiya greva birçîbûnê û têkoşîna Dayikên Laçik Spî û wiha bi dawî kir: "Vê tekoînê rê li vekirina Deriyê Îmraliyê vekir. Ji bo çareseriya demokratîk firsendek dîrokî daye pêş me. Em nikarin çareseriya Demokratîk ji hêzên îktîdarê bipên. Li hemberî banga Birêz Ocalan bi dagirkeriya Başûrê Kurdistanê bersîv dane. Îktîdara AKP- MHP'ê helwesta xwe carek din nîşan da. Em vê helwesta dagirkeriyê carek din şermezar dikin. Îktîdara AKP-MHP'ê dixw-aze çareseriyê provoke bike. Em bang li hemû hêzên demokrasiyê dikin ku li dijî dagirkeriyê dengê xwe bilind bikin. Ji niha û şûnde emê hemû çalakiyên xwe yên demokratîk û xebatên xwe yên rêxistinî li gorî lihevkirina civakî, demokratîkbûna Tirkiye pêş bixin. Ji bo vê yekê di serî de li Amedê, Kurdistan û Tirkiyeyê em bang li hemû gelê xwe, bawerî, kom, ciwan, jin, hemû beşên civakê, partiyên siyasî. rêxistinên demokratîk, rewşenbir, nivîskar, hunermend, parazvanên mafên mirova û hemû beşên ku nirxên azadî û demokrasiyê diparêzin dikin ku li dora nirxên demokratîk û azadiyê kom bibin û ji bo avakirina Tirkiyeya demokratîk em têkoşina xwe bi hevre bilind bikin. Wê Faşizm û zalim winda bikin. Wê azadi û demokrasî bi ser bikeve."