Cenazeyê Nevaf Kortak (Baran) ku di pevçûnên êdetirî hefteyeke li Dêrsimê didomin de jiyana xwe ji dest da, tevî hemû astengiyên polîsan hat veşartin. Kortak, di pevçûna 2'yê Gulanê de jiyana xwe ji dest da. Paşê cenazeyê wî anîn Saziya Tiba Edlî ya Meletiyê. Piştî rayedar li malbatê geriyan, malbat di 13'ê Gulanê de ji Bismila Amedê çû Meletiyê û cenazeyê Kortak duşema borî wergirt û anîn Bismilê. 

 

Dema malbatê cenaze ji Meletiyê dianî Bismilê, di rê de tim bi astengiyên polîs û leşkeran re rû bi rû maye û cenaze 6 saetan dereng anîne Bismilê. Di rê de ferdên malbatê tim hatine sekinandin û nasnameya wan hatiye kontrolkirin. Her cara hatine sekinandin, polîs û leşkeran di bin navê lêgerînê de tabût vekirine û kontrol kirine. 

 

'HÛN NIKARIN LI MIZGEFTÊ BIŞON' 

 

Malbatê bi şev cenaze aniye Bismilê. Ji bo wecîbeyên olî pêk bên cenaze anîne Mizgefta Medîneyê ya li Taxa Sanayiyê. Lê belê polîsan bi wesayîtên zirxî mizgeft dorpêç kiriye û astengî ji malbatê re derxistine û gotine: "Hûn nikarin li mizgeftê cenaze bişon. Divê meleyên bi kadro cenaze neşon." Li ser vê ferdên malbatê bertek nîşandan û li ser israra malbatê polîs bi paş ve kişiyane. Paşê ferdên malbatê û meleyek cenaze şûştiye. Lê belê ji ber zext ûz oriyên polîsan wecîbeyên olî tam pêk nehatine û cenaze li Goristana Akpinarê hatiye veşartin. 

 

Her wiha polîsan nehişt taziyeya Kortak li mizgeftê jî bê danîn. Li ser vê malbatê li hewşa mala xwe ya li Taxa Sanayiyê taziye danî. Li vê hewşa ku werdek û mirîşk jî lê dijîn, duh mewlût hat dayîn û taziye bi dawî bû. 

 

'EM Ê NEHÊLIN HÛNVEŞARIN JÎ' 

 

Ap Zubeyîr Kortak, bal kişand ser astengiyên polîsan û diyar kir ku polîsan ji wan re gotiye: "Mizgeft, mizgefta dewletê ye. Hûn nikarin li vira bişon. Em ê nehêlin meleyên bikadro cenaze bişon. Ji we kî dikare bişo bila bişo. Lê eger hûn dirûşmeyekê jî berz bikin em ê cenaze ji we bistînin û nehêlin veşêrin." 

 

TAZIYEYA XWE LI HEWŞA MALA XWE DANÎN

 

Kortak, destnîşan kir ku ji bo taziyeyê wan depoyek girtiye, lê belê polîsan nehiştiye taziyeya xwe li wê depoyê deynin û li ser vê mecbûr mane li hewşa xwe ya ku heywanên wan jî lê dimînin deynin. Kortak, destnîşan kir ku tevî hemû astengiyan jî wan şîna xwe daniye û gott: "Eger em xwedî li têkoşîna xwe xwedî derkevin, wê dijmin nikaribe bi ser me de bê. Lê eger em xwe bi paş ve bikişînin wê dijmin me bieciqîne." 

 

'JI BO XWE MISILMAN IN' 

 

Kortak, bertek nîşanî polîtîkayên AKP'ê jî da û got: "Di bin navê Îslamê de zarokên me dikujin. Ev nebes eli zindanan jî dikujin. Her wiha nahêle em cenazeyên xwe jî veşêrin. Nahêlin em şîna xwe jî deynin. Ev, ji bo xwe misilman in. Ya tê kirin faşîzm e." 

 

'NIZANIM ME ÇAWA VEŞART' 

 

Mele Ahmet Aydenîz ku cenazeyê Kortak şûş û veşart jî bertek nîşanî astengiyên polîsan dan. Aydenîz, diyar kir ku li navçeyê kî jiyana xwe ji dest bide ew tev li merasîma cenazeyên wan dibe. Aydenîz, bi bîr xist ku di dema anîna cenazeyê Kortak de polîsan hawirdora mizgeftê dorpêç kiriye û got: "Wexta me cenaze dişûşt, bi ser me de dihatin. Digotin 'Çima hûn ecele naşon.' Nizanim me çawa cenazeyê xwe veşart." 

 

'NEHIŞTIN EM DUA JÎ BIKIN' 

 

Aydenîz, destnîşan kir ku ewlet nahêle li mizgeftên ku li Bismilê bi alîkariya welatiyan hatine çêkirin cenaze bên şûştin û şîn bên danîn û got: "Me ev mizgeft û malên şînê çêkirine, dewletê çênekiriye. Em şafî ne. Li gor mezheba şafîbûnê wexta meleyên şaîf cenaze dişon li mizgeftê didin sekinandin û li ser yasînê dixwînin. Lê nehiştin em wisa bikin. Nehiştin em yasînê bixwînin û duayan bikin." 

 

Mele Aydenîz, destnîşan kir ku a tê kirin tu eleqeya wê bi îslamiyetê re tune ye û got: "Di her olî de, cenaze tên rakirin û ji bo veşartinê merasîm tê lidarxistin. Wecîbeyên olî pêk tên. Lê dewletê nehişt em wisa bikin."