Rêberê PKK’ê Abdullah Ocalan piştî 8 salan di 2’ê gulanê de li Îmraliyê bi parêzerên xwe re hevdîtin kir. Piştî hevdîtinê parêzerên Ocalan metna hevpar ku îmzeya Ocalan û îmzeyên 3 girtiyên li Îmraliyê lê hebû, bi raya giştî re parve kir. Di metnê de peyameke bi vî rengî ji Hêzên Sûriyeya Demokratîk (QSD) re hat dayîn: “Em bawer dikin ku pirsgirêkên Sûriyeyê di bin banê Hêzên Sûriyeya Demokratîk (QSD) de ji çanda pevçûnê dûr; Cih û rewşa ku têde ne, bi çareseriyeke, di çarçoveya hevgirtina Sûriyeyê de bi perspektîfa demokrasiya herêmî ku bi Desûra Bîngehîn pêk hatiye, bê armanckirin. Girêdayê vê yekê divê hesasiyetên Tirkiyeyê li ber çav bên girtin.” Berdevkê PYD’ê Salih Muslum têkildarî vê peyama Ocalan ji Ajansa Mezopotamyayê (MA) re axivî. 

 

‘OCALAN NÎŞAN DA KU EM DI RÊYA RAST DE NE’

 

Muslum diyar kir ku peyaman Ocalan nîşan dide ku di rêya rast de ne û wiha got: “Hesasiyet di rêzgirtina beranberî hev de derbas dibe. Nêrînên Ocalan gelekî kûr in. Ocalan Sûriye û Rojhilata Navîn baş dizane, nêrînên Ocalan ên di vê mijarê de ji bo me gelekî bi nirx in. Em gotinên Ocalan di pratîkê de pêk tînin û çareseriyeke ku hevgirtina Sûriyeyê bi Destûra Bingehîn pêk bîne dixwazin. Em dixwazin statuya herêma xwe fermî bikin. Em wisa bi hêsan dev ji axa xwe ya ku me bi berdelên gelek giran bi dest xistiye, ber nedin. Peyama Ocalan moral da me.”

 

‘HESASIYET RÊZGIRTINA BERANBERÎ HEV E’

 

Muslum destnîşan kir ku tu carî ji Tirkiyeyê re nebûne gef û wiha axivî: “Me dest nedaye axa Tirkiyeyê û karên wê yên navxweyî. Em tişta ku Ocalan jê re gotiye, ‘Hesasiyetên Tirkiyeyê’  bi rêzdarî pêşwazî dikin. Em tu carî nebûne gef. Ev jî ji bo me nuqteya hesasiyetê ye. Lê di rastiyan de aliyekî cuda jî heye. Çeteyên ku êrîşî herêma me kirin hemû ji Tirkiyeyê derbas bûn. Ji roja ku me pergala xwe ava kiriye ve rastî her cure gefê hatin. Bi gotinên xwe hewl didin pergala vêderê terorîze bikin. Van hemû nêzikbûna ji Tirkiyeyê hatin. Em hêvî dikin ku ew jî ji daxwaza Ocalan re rêz bigirin. Wê demê em hê hêsantir li hev bikin. Tişta jê re hesasiyet tê gotin rêzgirtine beranberî hev e.” 

 

‘DIVÊ JI EFRÎNÊ VEKIŞIN’

 

Muslum di berdewama axaftina xwe de diyar kir ku dikarin bi Tirkiyeyê re bên gel hev û ev tişt li axaftina xwe zêde kir: “Lê divê rewşa Efrînê û gefên li hemberî me bên zelalkirin. Em nikarin guhê xwe ji van mijaran re bigirin. Efrîn hatiye dagirkirin. Em nikarin vê yekê qebûl bikin. li aliyekî ve hem terorîze dike hem jî dagir dike. Hem QSD hem jî MSD vêya anî ziman. Heke ji dil çareseriyê dixwazin divê ji Efrînê vekişin. Divê çete ji Efrînê vekişin û Efrîn weke xwe ya berê bibe. Her wiha divê dev ji gef û dijminahiya xwe li hemberî kurdan berdin. Em dikarin li ser vê bingehê nêzî hev bibin.”

 

‘DIYALOG DÊ HEWAYEKE ERÊNÎ ÇÊBIKE’

 

Muslum anî ziman ku pirsgirêka kurd a Rojhilata Navîn gelek derdoran eleqedar dike û wiha dawî li axaftina xwe anî: “Elbet cudahiyên rewşa li Tirkiye û Bakur û Rojhilatê Sûriyeyê hene. Evder naşibe başûrê Kurdistanê. Planên Siltan hinek cuda dixebitin. Ji ber vê yekê her gavê carekê derdikeve dibêje, ‘Şaşiyên me li wir kir dê careke din nekin’ dubare dike. Em naşibin başûr, polîtîkayên me jî naşibin hev. Pirsgirêka Kurd li Rojhilata Navîn girêdayî hev e. Li her parçeyê astengiya herî mezin Tirkiye ye. Hewl didin mudaxaleyî her derî bikin. Ji ber vê sedemê heke Tirkiye pirsgirêka xwe ya kurd çareser bikira dê dijminahiya me nedikir. Rêyên cuda yên çareseriyê dikarin bên pêşxistin lê di encamê de hemû rê jî digihîjin deriyekê. Vekirina rêyên diyaloga siyasî ya li Tirkiyeyê dê hewayeke erênî ava bike.” 

 

MA / Nazım Daştan