NAVENDA NÛÇEYAN - Dayikan girtiyan, bi boneya Roja Dayikan, li Şirnex, Îzmîr, Edene, Mêrdînê û gelek bajarên din, daketin qadan û gotin: "Êdî bese, bila dayik negirîn. Vê qîrînê bibihîsin. Daxwazên zarokên me pêk bînin."
Li navçeya Hezexê ya Şirnexê dayikên girtiyên ji bo rakirina tecrîda li ser Rêberê Gelê Kurd Abdullah Ocalan di greva birçîbûnê de ne, endamên Meclîsa Dayikên Aştiyê bi wesîleya Roja Dayikan daxuyanî dan û rê girtin. Hevşaredara HDP’ê Songul Erden jî tevlî daxuyaniyê bû.
Dayika girtiyekê Xanê Babat di daxuyaniyê de axivî û got: “Em dixwazin ev tecrîd rabe û em zarokên xwe hembêz bikin.”
Dayikan piştre bi çepik û tilîliyan rê girtin û dirûşmên "Jin jiyan azadî" û "Bijî berxwedana zindanan" berz kirin.
MÊRDÎN
Li navçeya Qosera Mêrdînê, endamên Meclîsa Dayikên Aştiyê û dayikên girtiyan li Qada Azadiyê li hev kom bûn. Parlementerê HDP’ê Tûma Çelîk û gelek endamên HDP’ê tevlî çalakiyê bûn. Dayik bi qurnefîlan meşiyan û slogana ‘Bijî berxwedana zindanan’ berz kirin. Jinan qûrnefîl ki dayikan belav kirin û xwestin hemû kes piştgiriyê dibin çalakiya greva birçîbûnê.
Beriya belavkirina qerenfîlan Palamenterê HDP’ê yê Mêrdînê Tuma Çelîk axaftinek kurt kir. Tuma, di çarçoveya 12’ê Gûlanê de roja hemû dayikan pîroz kir û wiha got: “Em naxwazin şer hebe û rondikên çavên dayikan birijînin. Ji ber vê jî em soz didin ku em ê tim li gel dayikan bin. Ev şer û êş bila bi dawî bibe. Dayik bi tenê azadî û aramiyê dixwazin.”
Meş û çalakiya dayikan li ber avahiya rêxistinên HDP û DBP'ê yên Qoserê bi dawî bû.
ÎZMÎR
Li Îzmîrê jî, jin bi pêşengiya Meclîsa Dayikên Aştiyê hatin ba hev û derbarê Roja Dayikan de daxuyanî dan. Dayikan di daxuyaniyê de gotin: "Em roja dayikan pîroz nakin, em dixwazin zarokên me bijîn." Dayika Aştiyê Abîde Bayram got ku “Heta ku ev tecrîd ranebe em ê roja dayikan pîroz nekin.”
Çalakî bi tilîî û berzkirina dirûşmeyên "Leyla Guven rûmeta me ye" û "Bijî berxwedana zindanan" bi dawî bû.
RIHA
Ji bo bidawîkirina tecrîda li ser Ocalan xizmên girtiyan li Rêxistina HDP’ê ya Rihayê çalakiya rûniştinê dabûn destpêkirin. Çalakî di roja 2’an de didome. Dayik û xizmên girtiyan bi slogana ‘Bijî berxwedana zindanan’ ji avahiya HDP’ê heta Qada Ahmet Bahçivan meşiyan.
Piştî daxuyaniya li vê derê girse dîsa bi sloganên ‘Bijî berxwedana zindanan’ vegeriyan avahiya HDP’ê.
EDENE
Li Edenê jî, ji bo dayikên di greva birçîbûnê û rojiya mirinê de, gul hatin dayin. Girseya ku li avahiya HDP'ê ya Edenê kom bibû, xwest derbasî Parka Îsmet Înonu bibe. Lê polîsan deriyê avahiyê girtin û destûr nedain girse derkeve derve. Ligel hemû astengiyên polîsan jî, girse derbasî parkê bû û daxuyanî da çepmeniyê. Di daxuyaniyê de dayik axivîn û gotin: "Di van rojên xweş de, em li benda agahiyên xweşin. Di van rojên xweş de heqaret li me tê kirin. Bi hezaran girtî li ber xwe didin û em naxwain kes jiyana xwe ji dest bide. Tecrîd rakin û bila êdî zarok nemirin."
Piştî daxuyaniyê girse bi berzkirina dirûşmeyan derbasî avahiya HDP'ê bû.
DILOK
Li Dîlokê jî, dayikên zarokên wan di greva birçîbûnê dene, ji bo piştgiriya zarokên xwe hatin gelhev. Hevdîtin li avahiya Rêxistina HDP'ê ya navçeya Şahînbey hat lidarxistin û gelek kes beşdar bûn. Di hevdîtinê Hevseroka HDP'ê Sûltan Bayindir, çîçek da dayika Ayten Beçet a di 23'yê Adarê de, ji bo şermezar kirina tecrîda li Îmraliyê çalakî pêk anî û jiyana xwe ji dest da Fatma Beçet û roja wê ya dayikan pîroz kir.
ŞIRNEX
Meclîsa Dayikên Aştiyê û dayikên girtiyên di greva birçîbûnê û rojiya mirinê de jî, li navçeyên Cizîr û Sîlopî yên Şirnexê, daxuyanî da çapemeniyê. Daxuyaniya li Cizîrê, li avahiya Rêxistina HDP'ê ya Navçeyê pêk hat û dayikên laçik spî wêneyên girtiyan hilgirtin. Hevşaredarên HDP'ê yên Navçeya Cizîrê Mehmet Zirig û Berîvan Kûtlû qûrnefîl li dayikan belav kirin û roja dayikan pîroz kirin. Piştî daxuyaniya hat dayîn dirûşmeya "Bijî berxwedana zindanan" hat berz kirin.
Li navçeya Sîlopî jî bi heman armancê daxuyanî hat dayîn û piştî daxuyaniyê dayik heya ber mala Taybet Înan (Dayika Taybet) a di dema qedexeyan de hat kuştin û bi rojan cenazeyê wê li erdê ma, meşiyan. Dayikên ligel berzkirina tilîlî û dirûşmeyan gehiştin ber mala Dayika Taybet, malbata ziyaret kirin.
Dayikan dûre goristan ziyarat kirin û dawî li bernameya xwe anî.