MÊRDÎN – Hevşaredarê Mêrdînê Ahmet Turk peyama ku Rêberê PKK’ê Abdullah Ocalan û her sê girtiyên li cem, bi rêya parêzeran dan nirxand û wiha got: “Dema mirov bi awayekî giştî lê dinêre dibîne ku êdî mêzinkirin û pêşxistina siyaseta demokratîk û aştî ferz e, hêvî dikim ku her kes li gorî rihê vê peyamê tev bigere.”
Buroya Hiqûqê ya Asrinê duh bi civîneke çapameniyê, hurgiliyên hevdîtina ku di 2’yê Gulanê de li Girtîgeha Tîpa F a Îmraliyê bi muvekîlê xwe Rêberê PKK’ê Abdullah Ocalan re pêk anîn, bi raya giştî parve kir. Parêzeran her wiha metna ku bi îmzeya Ocalan û girtiyên li cem Veysî Aktaş, Hamîlî Yildirim û Omer Hayrî Konar hatibû şandin jî bi raya giştî re parve kir.
‘PEYAMA SÛRIYEYEKE DEMOKRATÎK DIDE’
Hevşaredarê Bajarê Mezin a Mêrdînê Ahmet Turk têkildarî peyamên Ocalan ji Ajansa Mezopotamyayê (MA) re axivî û diyar kir ku li benda daxuyaniyeke bi vî rengî bûne û wiha got: “Ocalan geşedanên li Rojhilata Navîn û cîhanê pir baş dixwîne. Ji ber vê sedemê peyama Sûriyeyeke demokratîk dide. Em dizanin ku heta li Rojhilata Navîn demokrasî tunebe tu pirsgirêk nayê çareserkirin. Pêşî Sûriyeyeke demokratîk, Desûra Bîngehîn a demokratîk û pergaleke ku herkes qebûl bike. Yanî peyama pergaleke ku hemû cudahî xwe di nav de bibînin heye. Di roja me îro de pirsgirêk çiqas mezin dibe bila bibe, dê teqez bi muazkereyê bê çareserkirin. Em dizanin ku bi fêmkirin û rêzgirtin hiqûq û mafê hev ev tişt dikarin bên çareserkirin. Di nav demê de gelek hewldanên ku me nedixwest pêk hatin; ketina Efrînê, sekna li hemberî kurdan a li deverên cuda. Em di serî de dibêjin ku ev şaş in. Lewra li her derê; li Iraq û Sûriyeyê berê kurdan li Tirkiyeyê ye. Hiqûqeke raborî heye. Raboriyeke ku demeke dirêj bi hev re jiyane heye. Ji ber vê yekê ferz e Tirkiye polîtîkayeke ku kurdan qezenc bike bimeşîne.”
‘JI BO AŞTIYÊ PEYAMÊN GIRÎNG IN’
Turk destnîşan kir ku bal kişandina Ocalan ser manîfestoya Newroza 2013’an girîng e û ev tişt gotin: “ Peyamên Newroza 2013’an ji bo aştî û demokrasiyê peyamên girîng bûn. Bibîrxistina vê peyamê, destnîşankirina kûrkirina ji hev fêmkirin û nêzikbûna rêzgirtina ji bo hiqûq û mafê hev peyamên girîng in. Li gorî min dema ku mirov bi awayekî giştî lê dinêre dibîne ku êdî mezinkirin û pêşxistina siyaseta demokratîk û aştî ferz e. Ji bo pêkanîna diyalogê wek peyamakê dibînin. Hêvî dikim ku herkes li gorî rihê vê peyamê tev bigere.”
‘HESASIYETA XWE YA MAFÊ JIYANÊ NÎŞAN DA’
Turk bal kişand ser beşa metnê ya têkildarî çalakiyen greva birçîbûnê û wiha dawî li axaftina xwe anî: “Daxuyanî wateya mirin tiştek çareser nake dide. Ev yek jî nîşan dide ku ji bo mafê jiyanê çiqas hesas e. Dema ku mirov bi giştî lê dinêre dibîne ku hem ji bo gelê xwe, hem ji bo kesên di zîndanan de û hem jî ji bo mirovên di çalakiya greva birçîbûnê de; ‘Ez hewldana wan bi qîmet pêşwazî dikim lê bêyî ku bi mirinê encam bibe divê bi dawî bibe’. Piştî vê peyama serok ez difikirim ku divê herkes xwe di ber çavan re derbas bike.”
MA / Ahmet Kanbal