Parlementerê HDP'ê yê Wanê Mûrat Sarisaç ku tevî parlementer Dersim Dag û Tayîp Temel li avahiya HDP'ê ya Amedê li dijî tecrîda li Îmraliyê di greva birçîbûnê de ye, bal kişand ser çalakiyên greva birçîbûnê û çalakiya rojiya mirinê ya 15 girtiyan. 

 

Sarisaç, anî ziman ku Rêberê PKK'ê Abdullah Ocalan tenê ne şexsek e û got: "Birêz Ocalan hem ji aliyê kurdan ve wek rêber tê qebûlkirin hem jî çend sal berê 10 milyon kes gotin 'Ocalan vîna min a siyasî ye.' Yanî tekane muxatabê pirsgirêka kurd e." Sarisaç, destnîşan kir ku nêzîkatiya ji bo Ocalan nêzîkatiya ji bo gelê kurd e. Sarisaç, ji bo çalakiya greva birçîbûnê ya Leyla Guven û her sê parlementeran jî got: "A rast ev nayê wateya pîrozkirina mirinê. Bereksê wê parastina jiyanê ye. Wexta me jî dest bi vê çalakiyê kir ne ji ber bêçaretiyê bû, armanca me ew e ku em dixwazin çavkaniya pirsgirêkan ji holê rakin. Ev daxwaz ji bo me daxwazên mafdar in, loma em di greva birçîbûnê de ne. Ji destekê wêdetir ev daxwaz daxwazên me ne jî." 

 

‘GOTIN QEDIYAYE DEM DEMA ÇALAKIYÊ YE' 

 

Sarisaç, ji bo çalakiya rojiya mirinê ya 15 girtiyan ku di 30'yê Nîsanê de çalakiya xwe ya rojiya mirinê veguherandin rojiya mirin got: "15 girtyan çalakiya xwe ya greva birçîbûnê veguherand rojiya mirin. Nexwe divê derdorên çep û sosyalîst, saziyên demokratîk û rewşenbîr vê yekê di ber çav re derbas bikin. Her çend çalakiya rojiya mirinê ya 15 girtiyan ji bo hikûmetê peyamek be jî, di heman demê de vê peyamê jî dide me: 'Ji ber hûn rola xwe nalîzin û ji ber hûn nikarin bikin ku hikûmet li gor qanûnên xwe tev bigere, wekî çareya dawî me serî li vê rêyê da.' Yanî ji niha û pê ve êdî gotin qediyaye, dem dema çalakiyê ye." Sarisaç, destnîşan kir ku ji bo daxwaza bên qebûlkirin divê her kes bi rêyên demokratîk barê dikeve ser mila bi cih bîne û faşîzmê bi paş bixe û got: "Bi vî awayî wê rê li ber mirinê û bêhiqûqîtiyê bê girtin."